Soñğı yıllarda 2 aprel' — millätlärneñ berläşü köne bularaq bilgelänep utelä. Biş yıl elek älege waqiğanı bilgeläp ütüne Udmurtiä respublikasınıñ milli säyäsät ministıyrlığı da ğadätkä kertte. Ministırlıq qarşında berläşep 26 milli—mädäni oyışma eşli. Här oyışmanıñ citäkçeläre, wäkilläre cıyılıp başqarğan eşläre xaqında urtaqlaşıp, problemaları turında citkerep, üzeşçän sänğät ostaları äzerlängän konsert nomeların qarap, telne, mädäniätne saqlap qaluda, üsterügä kertkän öleşläre, ireşkän uñışları öçen ministrlıq büläklären alıp, qayseber yıllarda şuşındıy çaralarda qatnaşqan respublika başlıqları çığışların tıñlap, bergä—dustanä mönäsäbättä yäşärgä süz birep taralışa idelär. Bu çaralar başta respublikanıñ başqalası İjaw şähärendä uzdırılsa, ber yılnı ul Mojgada ütkärelde, ä ağımdağı yılda millätlärneñ berläşü känen bilgeläp ütkärügä üzgäreşlär kertelde. Berençedän, anı milli säyäsät ministıyrlığı üze genä tügel yäşlärneñ «Vmeste» assotsiatsiäse belän bergä äzerläde. Bu çaranı ütkärüdä zur köç quyğan milli säyäsät ministıyrlığınıñ baş belgeçe İrina Şeda—Zorina basım yasap, bolay dide.
audioÜtkän comğada Millätlär berläşüe könenä İjaw şähäreneñ balalar teatrına kilüçe milli oyışmalar häm yäşlär berlekläreneñ äğzaların milli muzıka belän qarşı aldılar, qunaqlarğa «Bez — bergä» dip atalğan maxsus gazeta tarattılar. Gazetada tatar, rus, udmurt, yähüd, nemes, ärmän, koreya yäşlär berlekläre üzläreneñ iñ qızıqlı çaraları turında xäbärlär birä, oyışmaları xaqında mäğlumatlar citkerä. Tantananı başlap, milli säyäsät ministrı Vladimir Zawalin, milli oyışma citäkçeläre notıq yasadı. Respublikada millätlär assambleyası tözelüe turında da xäbär itelde. Alğa taba säxnäneñ xucaları bulıp yäşlär qaldı. Yäşlär berlekläre qarşında oyışqan mädäni tügäräk äğzaları häm başqa milli ansambl'lär qatnaşında qızıqlı ğına konsert buldı.
Tamaşanı respublikanıñ töp milläten täşkil itkän — udmurt xalıq cırları, iyülläre belän açtılar. Annan soñ süzne «İman» tatar Berlege aldı. Alar «Güzäl» tatar xalıq cır häm biyu ansambleneñ biyu kollektivın çaqırğannar. Qızlar-yegetlär bik osta itep başqarğan «Tatar yäşläre biyuen» zalda utıruçılarda iñ cılı xislär qaldırdı. Gimnaziä uquçısı Gölnaz Xäbirova başqarğan cır da alqışlarğa kümelde. Alqışlar digännän, ul könne dörestän dä, yäşlär här çığış yasawçını köçle alqışlarğa kümde, xättä qayseber uzeşçän artistlarnıñ bulğan kimçelegen dä kürmäskä, alarğa iğtibar itmäskä tırıştımı, yäisä başqaruçılarğa teläktäşlek belderergä omtıldımı, ber genä çığış yasawçınıñ da küñelen töşermäde. Misal itep äzerbäycan oyışmasınnan kilgän yäş yegetneñ säxnädä cırlağanda berniçä tapqır muzıka uyın qoralları totaştırğan elektr utı sunep, cırnı berniçä tapqır başlap, anı tämamlıy almasa da, yegetneñ küñelen kütärep, anıñ çığışın da alqışlap ozattılar. Ğomumän, zalda da, säxnä dä ber bersenä xörmät, teläktäşlek ide. Bu mönäsäbät alğa taba da könküreştä dä şulay bulsa ide digän ömet tä yuq tügel. Udmurtiädä älegä Mäskäw, Sankt—Peterburdağı kebek rus bulmağan millät wäkillärenä höcüm itelüe, yäşlärneñ alarnı cıyılıp qinaw oçraqları işetelmi. Monda respubliqa citäkçeläreneñ här millätneñ ixtıäcların qänäğätländerügä omtıluı, milli säyäsätneñ uylanıp xäl itelüneñ ber näticäse dip qabul itärgä kiräkter.
Xämidä Ğayfullina, «Azatlıq» radiosı, Udmurtiä.
