Accessibility links

якшәмбе, 11 декабрь 2016, Казан вакыты 09:01

Luara – milli teatrniñ yoldizi


Aprel'nıñ 5dә sänğät söyuçelär Luara Şakircanovanıñ icat kiçäsen dulqınlanıp qaradı. Qamal teatrı binasında ütkän bu bik matur kiçä Tatarstannıñ atqazanğan sänğät eşleklese Luara Şakircanovanıñ mul icadi xezmätenä bağışlanğan ide.
Luara -Zöxrä Şakircan qızı möğallimnär ğailäsendä tuğan. Tatarstannıñ Ätnä rayonı Külle Kimi awılında üsep, uquda da, üzeşçän sänğät eşlärendä dä bik sälätle bula. Tanılğan şağir Sibğat Xäkim tuğan bu awıl Luara Şakircanovanıñ ğailäse belän dä bik ğorur. Kiçädä qatnaşqan apası Lena Şağircan tatar şağirläreneñ iñ asıllarınnan diärgä bula. Ütkän comğada Külle Kimi awılında Luara xanımnıñ icadi tormışına bağışlap kiçä oyıştırğannar ide.
Qamal teatrında Luara Şakircan teatr muzeen citäkli. Yäşli tatar teatrı belän cenlängän Luara xanımnıñ muzeyda, teatrda ütkärgän kiçäläre zatlı milli sänğät ürnäkläre bulıp sanala. Ul bik osta itep ssenariylar yaza torğan keşe häm şul uq waqıtta kiçälärne dä bik mawıqtırğıç itep alıp baruçı xanım. Törle, xätta onıtılğan äsärlärgä ssenariy yazu häm şunıñ belän äsärgä ikençe tormış büläk itü, älbättä, här keşeneñ qulınnan kilgän şöğel tügel. Üzeneñ küpqırlı şäxes buluın ul güzäl proza häm şiğerlär yazıp ta hiçşiksez rasladı. Bik üzençälekle, üzenä ber törle bu şäxes Tatarstandağı ğına tügel, ä Finlyandiä tatarları ezennän dä yörep, anda spektakl'lär quyarğa yärdäm itkän. Ğomumän yazmışın millät üseşenä bağışlıy ul. Şuña kürä nurlı yözle Luara xanımnıñ şuşı kiçäsenä dä xalıq bitaraf bulıp qala almağan, älbättä.
Anıñ elekke häm xäzerge xezmättäşläre – alar Tinçurin teatrı artistları, Tuqay filarmoniäseneñ zıyalıları, İlham Şakirov, Zöxrä Säxäbieva, Zilä Sönğatullina kebek tanılğan cırçılar, Ğäliäskär Qamal akademiä teatrı artistları, awıldaşları bersen-berse uzdırıp, Luara xanımnı çın küñeldän qotladı. Respublikanıñ mädäniät ministrı İl'dus Tarxanov Luara Şakircanovanıñ uñışlı icadi xezmäten bilgeläp, anı täbrikläde häm büläkläde.
Kiçädä säläten tağın ber qat raslap, Luara Şakircan üzeneñ häm tärcemä itep Mariä Zvetaevanıñ şiğerlären uqıdı. Şiğerlärendä Luara xanım Täñre aldında bulğan üzeneñ böten barlığın, xakıykäten añlağan belem iäse, mäñgelek köräşçe häm şul uq waqıtta bik neçkä küñelle söyugä omtılğan şiğri can. Ul yaza, söyli, kürsätä häm şundıy itep qabul itä dä anı xalıq.
Al'bina Zäynulla, Qazan.

XS
SM
MD
LG