Accessibility links

шимбә, 10 декабрь 2016, Казан вакыты 21:39

Yevropa Üseş häm Tärräqiät bankı Üzbäkstanğa kreditlarnı tuqtata


Bügen Yevropa Üseş häm Tärräqiät bankı Üzbäkstanda säyäsi repressiälär däwam itüe häm iqtisadi reformalar ütkärelmäwe säbäple küpçelek kreditlarnı tuqtatuın belderde. Banknıñ prezidentı Jean Lemierre, bez "reformalar ütkärüne taläp itäbez" yuqsa Üzbäkstanda eşne däwam itep bulmayaçaq, dip belderde. Ğayepläwlärneñ berse – dekabr ayında uzaçaq parlament saylawlarına oppozitsiädäge partiälärne terkämäw bulıp tora. Şulay uq Üzbäkstanda böten mäğlümat çaraların däwlät kontrol itä häm aña qarşı çıqqan jurnalistlar ezärleklänä. Lemierre süzlärenä qarağanda uzğan atnalarda Üzbäkstandağı köç qullanu – bank qararına ber nindi dä tä'sir yasamağan. Üzbäkstan polisiäse xäbär itüençä uzğan atnada 47 keşeneñ häläk buluına kitergän terror höcümnären oyıştıruda şiklänelgän keşelärneñ barısı da diärlek qulğa alınğan, dip xäbär itte. Taşkenttağı terrorğa qarşı köräş bülegeneñ başlığı urınbasarı Oleg Biçenov Associated Press xäbärlär agentlığına, qulğa alınğannarnıñ qayberläre höcümnärne oyıştıruda şiklänelä, dip belderde. Ul bu xaqta tulıraq mäğlümat birmäde ämma uzğan atnada Üzbäkstannıñ baş prokurorı beldergänçä – kimendä 19 keşe qulğa alınğan, alar arasında 4 xatın-qız bar. Şulay uq üzbäk räsmiläre 28 mart könne başlanğan terror ğamällärenä nindider xalıqara suğışçılarnıñ qatnaşı da bar, dip farazlıy. Üzbäkstan Amerika Quşma Ştatlarınıñ terrorğa qarşı koalitsiäsenä kergän illärneñ berse, häm xäzerge waqıtta Üzbäkstan belän Äfğanstan çigendä yözlägän amerikan xärbi urnaşqan.

XS
SM
MD
LG