Accessibility links

пәнҗешәмбе, 8 декабрь 2016, Казан вакыты 19:03

Koalisiä köçläreneñ Ğiraqta yuğaltuları däwam itä


Ğiraqnıñ törle şähärlärendä bügen köç qullanu däwam itte. Britaniä premyer-ministrı Tony Blair Londonda Ğiraq tışqı eşlär ministrı Hoşyar Zebari belän oçraşqannan soñ uzdırğan press-konferensiädä mondıy höcümnärdän soñ – xakimiätne ğiraqlılarğa 30 iündä tapşıru niäte tağın da köçäyä, dip belderde. Bağdadtağı ike xastaxanä tabipları Frans Press mäğlümat agentlığı xäbärçesenä soñğı berniçä kön däwam itkän bäreleşlärdä kimendä 60 ğiraqlı hälak buldı, 230dan artığı yaralandı, dip belderde. Amerikan ğaskärläre xäbär itüençä, Bağdadta kiçä 3 xärbi hälak bulğan, könbatıştağı Anbar provinsiäsendä maxsus köçlärneñ 4 xärbie üterelgän. Falluca şähärendä ğısıyançılar belän amerikan ğaskärläre arasında bäreleşlär bügen dä däwam itte. İtalyan xärbi köçläre urnaşqan Nassiriya şähärendä, İtaliäneñ Ansa xäbärlär agentlığı belderüençä, bäreleşlärdä 15 ğiraqlı häm 12 italyan xärbie hälak bulğan.

Kut şähärendä 1 ukrain xärbie hälak bulğan, kimendä 5se yaralanğan. Amerikannar citäkçelegendäge koalisiä şiği möselmannarı ruxanie Moqtada al-Sadrnı qulğa alu turında qararın iğlan itkäç, Ğiraqta ğısyançılarnıñ amerikannarğa qarşı toruı tağın da köçäyde. As-Sadrnıñ kiñäşçese Qays al-Khazali bügen anıñ süzlären kiterep, Ğiraqtan amerikannar citäkçelegendäge köçlär çığıp kitkänçe häm totqınnarnı törmädän azat itkänçegä qadär köç qullanu däwam itäçäk, dip belderde.

XS
SM
MD
LG