Uzğan yılnıñ 27 dekaberendä Qazanda Jurnalistlar yortında “Tatar internetı yoldızları” digän berençe xalıqara konkursnıñ ciñüçelären büläkläw tantanası ütte. Bu konkursnı oyıştıruçı – “Tatar internetı” isemle xalıqara oyışma. Konkursnıñ ideyäsın birüçe häm töp eşlärne başqaruçı – Mäskäw yegete Aynur Sibgatullin. Aynur häm anıñ “Tatar internetı” oyışması buyınça kollegaları konkursnı uzğan yılnıñ aprel' ayında iglan itkännär ide häm konkurs näticäläre avgust ayında bilgele bulırğa tieş ide. Ämma büläklär satıp alırğa waqıtında aqça tabılmaw säbäple büläkläw tantanası dekaber ayına qadär kiçekterelde. Bäxetkä qarşı, konkursqa İntertat.ru elektron gazetası häm Tatarstannıñ “Tatmedia” oyışması quşılğaç, aqça Tatarstan Respublikası byudjetınnan tabıldı.
Bu könnärdä “Tatar internetı yoldızları” konkursı yañadan başlana häm konkursnıñ näticäläre avgust ayında yomğaqlanır. Konkursnıñ töp maqsatı — iñ yaxşı tatar saytların ezläp tabu, alarnı bilgeläw, alarğa büläklär birü. Tatar saytların eşläwçe dizaynerlar häm redaktorlar, alarnıñ eşläre yuğarı bäyälängäç, tağı da yaxşıraq eşlärgä stimul alalar. Ciñüçe bulalmağan, büläklär alalmağan saytlarnıñ xucalarına da fayda kilä, alar kürälär – nindi yunäleştä alarğa eşlärgä, niçek üz eşlären yaxşırtırğa. Şulay itep bu konkurs tatar internetın üsterüdä üzeneñ zur öleşen kertä.
Soñğı 2—3 yıl eçendä küp kenä tatar saytları barlıqqa kilde, qayberläre tanıldı, qayberläre yuq, qayberlärenä internetta säyäxät itüçelär küp kerä, ä qayberlärenä bik az kerälär. Ber—berse belän köndäş bulğan tatar saytları törle yunäleşlärdä eşlilär. Mäsälän, tanışu saytları bar, muzıykağa bağışlanğan saytlar, tarix, mädäniät buyınça saytlar, tatar ğazetlarınıñ saytları, häm başqalar. Şunnan bu “Tatar internetı yoldızları” konkursında qatnaşuçı saytlarnı törle nominatsiälarğa bülep, här nominatsiäda üzläreneñ ciñüçeläre bilgelänä. Uzğan yılda 12 nominatsiä bulsa, bıyıl nominatsiälar sanı azaydı – bıyıl konkursta 6 nominatsiä ğına qaldı. Alar arasında şundıylar:
Berençe nominatsiänıñ iseme – “İnternet çeltärendä iñ yaxşı tatar massa—küläm informatsiä çarası”. Monda ğazet, jurnal, televizion— häm radiostansiälarnıñ saytları, maxsus elektron massa—küläm informatsiä çaraları qatnaşa. Alarnıñ tatar, urıs, ingliz häm başqa tellärdä buluı mömkin, ämma materialları, publikatsiäları tatarlar belän bäylängän bulırğa tieş.
İkençe nominatsiä – “Tatar cämäğätläreneñ, diasporalarnıñ iñ yaxşı saytı”. Monda Tatarstannan çittä yäşägän tatarlarnıñ saytları ğına qatnaşa. Öçençe nominatsiä – “Tatarlarnıñ mädäniätı, tarixı häm etnografiäse buyınça iñ yaxşı sayt”. Dürtençe nominatsiä – “Tatar muzıykasına bağışlanğan iñ yaxşı sayt”. Bişençe nominatsiä – “Tatarstan Respublikasınıñ predpriätieläreneñ iñ yaxşı saytı”. Monda predpriätielärneñ üz eşçänlekläre turında, üzläre citeştergän produksiä turında mäğlumat birgän saytlar qatnaşa. Häm soñğı nominatsiä – “Tatarstan Respublikasınıñ iñ yaxşı saytı”. Monda Tatarstan Respublikasına qağılışı bulğan böten saytlar qatnaşa ala.
Uzğan yıl “Tatar internetı yoldızları” konkursında 115 sayt qatnaştı. Bıyıl da yaqınça şul uq san bulır dip kötelä. Nominatsiälar sanı azayu konkurensiänı köçäyter, älbättä. Bälki, uzğan yıl kebek ük, yäşlär tematikası buyınça ayırım, cidençe nominatsiä kertergä kiräkter. Konkursta qatnaşırğa teläwçelär böten kiräkkän informatsiänı bu könnärdä törle tatar forumnarında häm konferensiälarında tabarlar.
Azatlıq radiosı öçen Mordoviädan İrek Bikkinin.
