Accessibility links

Кайнар хәбәр

Valentina Matvienko tuğan könenä Qazan küreneşen aldı


Respublika häm başqala citäkçelegeneñ küpçelege bu könnärdä törle säfärlärdä. Tatarstannıñ prezidentı Mintimer Şäymiev häm Däwlät Şurası räise Färit Möxämmätşin yal itsä, respublika xökümäteneñ citäkçese Röstäm Miñnexanov häm Qazan xakimiäte citäkçese Kamil İsxaqov eş säfärlärendä yörilär. Röstäm Miñnexanovnıñ ğomumän bu arada eş tärtibe bik tığız. Sişämbe könne ul respublikanıñ transport häm yul xucalığı ministrı Vladimir Şvetsov belän bergä Mäskäwdä ütkän Rusiäneñ yul xucalığı eşçänlegenä bağışlanğan konferensiädä qatnaştılar. Çärşämbe könne ul Yäşel Üzän rayonında bulıp, rayonnıñ xakimiät başlığı bulıp küptän tügel genä eşli başlağan Gennadiy Emelyanovnıñ eşçänlege belän tanıştı. Ä 8 aprel’dä premyer-ministr Kaliningrad ölkäsenä ike könlek räsmi vizitın başlıy.

Kamil İsxaqov isä bu könnärdä Sankt-Peterburg şähärendä. Anıñ citäkçelegendäge delegatsiä tönyaq başqalağa da Qazannıñ yubileyın ütkärü buyınça täcribä cıyarğa kitte. Belüegezçä, bıltır Piternıñ 300 yıllığın bik tantanalı räweştä bäyräm ittelär. Ber ük waqıtta Kamil İsxaqov şähärneñ başlığı Valentina Matvienkonı tuğan köne belän qotlıy alaçaq. 7 aprel’dä Valentina xanımnıñ tuğan köne. İsxaqov üzeneñ kollegasına büläkkä Qazan turında istälek – başqalabıznıñ osta qulları tarafınnan törle töstäge kün kisäklärennän eşlängän Qazan küreneşen alıp kitkän. Ä räsmi eşlärne tämamlağaç Kamil äfände Qazannıñ Rubin futbol komandasınıñ uyının qaradı. Çärşämbe könne rubinçılar Sankt-Peterbirgnıñ Zenit komandası belän oçraştı. Şulay itep, Qazan şähäre xakimiäte başlığı Piterda beryulı berniçä bik möhim eşne başqarıp qayttı. Läkin ul qunaqta yörgän arada, başqala, döresräge, Qazandağı sanitar-ekologik xäl tänqitkä duçar buldı, Qazan Tatarstannıñ iñ äşäke şähäre, dip äytelde. Bu xaqta süz sişämbe könne respublikanıñ Ministrlar Kabinetında ütkän brifingta bardı. Anda şulay uq Ministrlar Kabinetınıñ Apparat citäkçese İldar Fättaxov respublikada sanitar-ekolog xälneñ torışın yaxşırtu öçen eşlänelgän ğämällär turında söyläde.

Gölnaz İlgizär

XS
SM
MD
LG