Xac qılu - här möselmannıñ izge burıçı. Ägär Qorban bäyräme aldınnan xac qılırğa ölgermägän bulsağız, bu izge eşne yıl äylänä dä başqarırğa mömkin. Umra, ğädäti xac kebek uq, şundıy uq sawaplı ğämäl. Ämma ul, xac qılu burıçınnan azat itmi, barı tik Ramazan ayında qılınğan umra ğına ğädäti xac belän ber däräcädä, dip isäplänä.
Säğüt Ğäräbstanı umrağa kilüçelärne qabul itärgä äzer buluı xaqında iğlan itte. 20 aprildän başlanğan bu çarağa 150 ildän möselmannarnıñ kilüe kötelä. Tatarstan wäkilläre dä anda bulaçaq.
23 aprildän Qazannan, Lufthanza şirkäte oçqıçları belän, 20 keşelek wäkillek Mäkkägä kitärgä tora. Yullama 1,500 $ töşärgä tieş. Säğut Ğäräbstanınıñ Mäskäwdäge ilçelege april urtasınnan viza käğäzlären birä başlıy. Qazannan barğan keşelär, berençe tapqır xac qıla. Umrağa keşelär dä azraq kilgängä kürä, Mäkkä-Mädinädäge yäşäw, xezmät kürsätü şartları da yaxşıraq bulırğa tieş.
6nçe aprel’dä, Mäskäwdä ütkän xac eşläre Şurası, älege cawaplı eşkä äzerlek mä’sälälären, kilep çıqqan qıyınlıqlarnı tikşerde. Şuşı cielışqa Tatarstan möftie urınbasarı Ayaz äfände Minğaliev dä bardı. Anıñ äytüenä qarağanda, xaclar oyıştıruçı turistik şirkätlär arasında wazifaların tieşençä ütämägän, xacilarnı aldağan şirkätlär dä bulğan. Şuña, xac eşlären qarawçı Şura turistik şirkätlärgä taläplärne qırıslatırğa kiräk, digän näticägä kilgän. Xac säfären oyıştıru däräcäse – nindi transport belän baru, yulda xac qağidälären añlatuçı maxsus keşelärneñ buluı, Ğäräfä tawında qunğanda, çatır belän tä’min itü, qunaqxanäneñ qaya urnaşuı häm niçä yoldızlı buluına qarap bäyälänä. Xac eşlären bağuçı Şura, Qazandağı şirkätlär, xac oyıştıru taläplärenä cawap birä, digän näticä çığarğan.
Bikä Timerova.
