Accessibility links

шимбә, 3 декабрь 2016, Казан вакыты 18:50

Falluca şähärendä amerikan oçqıçınnan atılğan raketa mäçet kompleksına eläkkän


Mäğlümat agentlıqları xäbär itüençä Ğiraqnıñ Falluca şähärendä amerikan oçqıçınnan atılğan raketa mäçet kompleksına eläkkän, hälak buluçılar bar. Bügen Quşma Ştatlar ğaskärläreneñ maxsus köçläre Ğiraqnıñ Falluca şähärenä kerde, dip xäbär itelde. Koalisiä köçläre häm Ğiraq ğısyançıları arasında qatı bäreleşlär däwam itä. Bağdadtan 50 çaqrım yıraqlıqtağı Baquba şähärendä ber amerikan boralağı bärep töşerelgän. Hawica şähärendä sönni möselmannarın yaqlap oyıştırılğan urım cıyınında qatnaşqannar belän amerikan xärbiläre arasında bulğan bäreleşlärdä 8 ğiraqlı hälak bulğan. Ukraina saqlanu ministrlığı xäbär itüençä könyaqtağı Kut şähärennän Ukraina xärbi köçläre çığarılğan. Anda kiçä ber ukrain xärbie hälak buldı. Koalisiä köçläreneñ Bağdadtağı matbuğat wäkile Dan Senor, Ğiraqta "xalıqnıñ keçkenä ber öleşe" ildä demokratik cämğiät buluın telämi, şuña köç qullanu däwam itä, dip belderde: "Xalıqnıñ azçılıqtağı ber öleşe qullarına qoral aldı. Bu keşelär häm oyışmalar – ilneñ kiläçägen bötenläy başqa törle küzallıy. Alarnıñ qaraşı beznekennän häm Ğiraq xalqınıñ zur öleşe qaraşınnan nıq ayırıla. Xalıqnıñ küpçelege isä – demokratik Ğiraq, qoral belän tügel, ä saylawlar aşa tözelgänxökümäte bulğan Ğiraqnı küzallıy," dide amerikan ğaskärläre wäkile. Amerikan köçläreneñ başqa ber wäkile, general Mark Kimmit, amerikannar citäkçelegendäge ğaskärlär Ğiraqnıñ üzäk häm könyaq rayonnarında Moqtada As-Sadrnıñ Mähdi armiäsenä qarşı xärbi çaralarnı däwam itä, dip belderde. Kimmit As-Sadrnı qoralnı taşlap birelergä çaqırdı. İke yaqta da hälak bulğannarnıñ sanı kön sayın arta. Bügen Ğiraqqa Amerikannarda künegülär ütkän 160 Gruziä xärbie kitte. Tbilisi yanındağı xärbi bazada uzğan ozatu çarasına Amerika Quşma Ştatlarnıñ Gruziädäge räsmi wäkile Richard Miles qatnaştı. Gruziä ğaskärläre Bağdad, Tikrit häm Baiji şähärläre yanında toraçaq. Mart ayı başında Tikrit yanında xezmät itkän 70 Gruziä xärbie kire Tbilisiğa qaytıp kitkän ide.

XS
SM
MD
LG