Accessibility links

якшәмбе, 11 декабрь 2016, Казан вакыты 15:03

Qazan uquçıları eş saylıy


Qazan yärminkäsendä ütä torğan bu kürgäzmäneñ töp maqsatı – mäktäpne tämamlawçı yäşlärgä üzläreneñ kiläçäkläre turında uylanıp, alarğa döres yul saylawda yärdäm itü, Tatarstannıñ mäğärif ölkäsendäge mömkinçelekläre, mäğärif oyışmalarınıñ innovatsion eşçänlege belän tanıştıru. Aprel başına respublikada eşsezlärneñ sanı 26 meñnän artıq keşe täşkil itüne istä totsañ, älege çara bik urınlı häm möhim bulıp çığa. Bu xaqta jurnalistlar öçen ütkän brifingta kürgäzmäne oyıştıruçılar respublikanıñ Mäğärif häm Xezmät häm mäşğüllek ministrlıqları wäkilläre söyläde. Şuşı maqsatqa ireşü niätennän Mäğärif. Karyera-2004kä bik küp qatnaşuçılar çaqırılğan. Alar arasında yuğarı häm urta maxsus uqu yortları, respublika külämendä iñ yaxşı dip tanılğan mäktäplär, litseylar häm gimnaziälär, näşriätlär, maxsus belem kütärü kursları, muzikal häm estetik belem birü mäktäpläre, eş belän täemin itü üzäkläre, törle kadrlar agentlıqları bar. Şunısın äytergä kiräk, monda Tatarstannıñ ğına tügel, ä Mäskäwneñ häm qayber kürşe-tirä respublikalarnıñ wäkilläre dä qatnaşa.

Kürgäzmädä qatnaşuçılar sanı kebek ük, anı qararğa kilüçelär dä şaqtıy. Alar arasında uqıtuçılarnı, Qazan mäktäplärennän klassları belän kilgän uquçılarnı kürergä bula ide. Kilüçe yäşlärneñ ber öleşe pavil’onnarğa kerep tä çıqmıy, çat-çotta, kibet tiräsendä yörsä dä, küpçelege kürgäzmä belän zur qızıqsınu kürsätep tanıştı. Bez monda mäktäptän soñ qaya barırğa ikänen xäl itü, kübräk mäğlümat alır öçen kildek, didelär alar.

Şulay uq älege kürgäzmä qısalarında yäşlär arasında proforientatsiä eşçänlegenä bağışlanğan berniçä qızıqlı konferensiä dä qaralğan. 8 aprel könne, mäsälän, respublikada şaqtıy uñışlı ğına eşläp kilä torğan däwlät xezmätkärlären äzerläw buyınça Prezident programması nigezendä belem aluçılarnıñ cıyılışı ütte. Comğa könne kürgäzmädä qatnaşuçılar xäzerge zamanda uquçılarnıñ bulaçaq professiälären saylaw xaqında kiñäşläşäçäk. Şimbä könne isä 21 ğasır däresleklärendä milli-regional komponent dip atalğan fänni-ğämäli konferensiä uzaçaq. Mäğärif. Karyera-2004 kürgäzmäse üzeneñ eşen 10 aprelgä qädär däwam itäçäk.

Gölnaz İlgizär

XS
SM
MD
LG