Accessibility links

пәнҗешәмбе, 8 декабрь 2016, Казан вакыты 13:00

Qazanda Sankt-Peterburg uramı bulaçaq


9 aprel’ könne Tatarstannan wäkilläreneñ Kaliningrad ölkäsenä räsmi vizitı tämamlandı. Premyer-ministr Röstäm Miñnexanov citäkçelegendäge delegatsiä ölkä belän Tatarstan arasında xezmättäşlek turında söyläşep qayttı. Qazan xakimiäte başlığı Kamil İsxaqov citäkçelegendäge başqalabız wäkilläre dä Sankt-Peterburg şähärennän qayttı. Alarnıñ säfärläre dä näticäsez ütmäde. Rubin futbol komandası Piternıñ Zenit futbolçıların ciñä almadı anısı. Anıñ qarawı, xäzer Qazanda Sankt-Peterburg uramı bulaçaq. Citmäsä, piterlılar başqalanıñ meñyıllığına elek Sverdlov isemen yörtkän älege uramnı tözekländerep, anı Peterburg ruxında üzgärtep, Petr Igä häykäl dä quyaçaqlar.

Respublika Törkiä belän dä aralarnı da nığıta. Bu yulı – din ölkäsendä. İnde xäbär itkänebezçä, 11 aprel’gä qädär Qazanda Törkiäneñ Din eşläre buyınça idärä räise Ali Bardaqoğlı bula. Comğa könne ul Diniä Näzarätendä jurnalistlar belän oçraşıp, üzeneñ respublikağa säfäreneñ maqsatları turında söyläde. Anıñ fikerençä, Qazan – bik borınğı şähär häm monda teologiä, islam mäğärifeneñ bay traditsiäläre bar. Bez şularnı bergäläp üsterergä tieş, dide. Bu xaqta süz Tatarstan möftie Ğosman xäzrät İsxaqi belän oçraşuda da bardı. Annarı Ali Bardaqoğlı Märcäni mäçetenä bardı, anda namaz uqıp, şäkertlär belän oçraştı. Şulay uq ul respublika citäkçelege belän küpsanlı oçraşular ütkärde, islam universitetında buldı. Vizit qısalarında anı izge Bolğar cirenä säyäxät tä kötä.

Comğa könne Qazan şähäreneñ kiläse 10 yılda üseş planın tikşerdelär. Başqalabıznıñ kiläçäktä nindi buluın Qazan arxitektorları ğına tügel, ä alarnıñ Mäskäwdän häm Sankt-Peterburgtan kilgän kollegaları da xäl itä ikän. Konsul’tativ-ekspertlar Şurasınıñ çirattağı utırışında şähärneñ general’planınıñ konsepsiäse, anıñ Qazannıñ ekologik xälenä tä’sire tikşerelde.

Gölnaz İlgizär

XS
SM
MD
LG