Accessibility links

пәнҗешәмбе, 8 декабрь 2016, Казан вакыты 23:08

«Tatnet yoldızları-2004» bäygese başlandı




Ütkän yılda uzdırılğan bu bäyge internet cämäğätçelegendä zur qızıqsınu uyattı. Ul kompyuter, virtual dönyada qaynıy torğan az sanlı belgeçlärne genä tügel, dönya päräwezennän yıraq torğan tatar cämäğätçek wäkillären dä cälep itte, bäygeneñ danı yıraqlarğa taraldı.



«Tatnet yoldızları-2004» bäygeseneñ başlanıp kitüe uñayınnan, jyuri äğzäse häm oyıştıruçı Alfiä Miñnullina belän söyläşep aldıq. Ul äle «İntertat» elektron gäziteneñ tatar bülegen dä citäkli. Anıñ äytüenä qarağanda, «Tatar internetı» xalıqara oyışmasınıñ Prezidium utırışı 7nçe aprel könne uq, bäygeneñ eş käğäzlären äzerläp quyğan, Belgeçlär Şurasın häm anıñ wazifaların bilgelägän. Şuşı «Tatnet yoldızları» bäygesenä täqdim itelgän saytlarğa Belgeçlär Şurası bäyä biräçäk.

Anda mäsälän, latin xäreflärendäge saytlarınıñ eçtälegenä «Azatlıq» radiosı xäbärçese Näzifä Kärimova bäyä biräçäk. Tatarça kirilça säxifälärne İrek Bikinin häm Alfiä Miñnullina qarayaçaq. Äle här säxifäneñ qullanuçılar öçen uñaylığı, bizäleşe, tözeleşe ayırım belgeçlär tarafınnan bäyälänäçäk. Bu: «Tatshop» virtual kibete redaktorı – Lenar Zakirov, Kazaxstan İnternet säxifäläre belgeçe – Aleksandr Läxov, tatar.ru saytı wäkile Azat Axtareev häm başqalar.

«Kem xökem itä?» digän sorawğa cawap taptıq. Xäzer «Närsägä kiräk bu bäyge?», digänenä dä äyter süz ezläp qarıyq.

«Татарская газета»nıñ forumında «Tatnet yoldızları» bäygeseneñ başlanıp kitüe turında xäbär elengäç, anıñ tiräsendä fiker alışular başlandı. Mäsälän, tatar internet cämäğätçelegenä Bıltır iseme belän tanış idäräçe, bäyge belän qızıqsınuın belderde. Virtual dönyada Bıltır, ä real tormışta Azat Säyfetdinov isemnären yörtkän bu idäräçe, ütkän yılğı bäygedä, tatar-bashkir.narod.ru digän saytı belän qatnaşıp, ciñep çıqqan ide. Bu yulı ul pemr-barda.narod.ru häm tatarica.narod.ru saytların täqdim itärgä teli. Anıñ äytüenä qarağanda, aña eşlägän säxifäneñ kemgä dä bulsa kiräk buluı häm idäräçeneñ quyğan xezmäten bäyäläw qäderle.

Ägär sez dä, sayt yasap, bäygegä köç sınap qararğa telisez ikän, kiräkle mäğlümatlarnı, şuşı könnärdä açılaçaq maxsus saytta taba alırsız. Adresın ayırım iğlan itärbez. Älegä sayt äzerlänep betmägän. «Azatlıq» radiosında çığıp kilüçe «Tatnet» tapşıruı, bäygeneñ barışın daimi yaqtırtıp barırğa wäğdä itä.

Bikä Timerova. bike@azatliq.ru

XS
SM
MD
LG