Accessibility links

чәршәмбе, 7 декабрь 2016, Казан вакыты 00:50

Ğiraqta soñğı ber atnada barğan bäreleşlär Waşington belän Ğiraq İdarä Şurası arasındağı fiker ayırmalıqların tağın da tiränäytä


AQŞ 30-nçı iyündä Ğiraqta xakimiätne näq menä nigezendä İdarä Şurası täşkil itüçe bilgelänep quyılğan xökümätkä tapşırır dip kötelä ide. AQŞ bilgeläp quyğan idarä şurasınıñ ber äğzası Abdul Kärim Mäxmüt äl Möxämmät Ğiraqta qan toyu tuqtalğançığa qädär şura eşendä qatnaşmıy toraçağın belderde. Ğiraqnıñ keşe xoquqları ministrı Abdel Basit Turkinıñ da wazıyfasınnan kitüe häm tağın ber şura äğzasınıñ kitü belän yanawı turında xäbär itelä. Uzğan töndä İdarä Şurası atışlarnnı kiçekmästän tuqtatunı taläp itte häm Falluja xalqına qarata berdäm cäzalaw çaraları kürelä digän tänqit belderde. Falluca şähärendä häm anıñ tirälärendäge bäreleşlärdä 400-dän artıq ğiraqlı häm distälärçä AQŞ soldatı üterelgän dip xäbär itelä. Biredä AQŞ xärbiläre sönni kütäreleşen bastırırğa tırışa. İdarä Şurası äğzası Adnan Paçaçi bolay dip belderde:

AUDİO: Bez amerikan köçläreneñ xärbi çaraların ğäyeplibez. Çönki bu Falluca xalqın berdäm cäzalaw çaraları.

Bügen bäreleşlärne tuqtatu turında söyläşergä dip Fallucağa Ğiraq citäkçelege wäkilläre kilde. Alar arasında ike şura äğzası da bar. Bügen AQŞ köçläre ğisyançılarğa atışlarnı tuqtatu täqdime belän çıqtı. Şul uq waqıtta AQŞ xärbiläre wäkile general Mark Kimmit Amerikan köçläreneñ üz-üzlären saqlaw xoquqı bar dide:

AUDİO: Bu adımğa bez doşman bülekläreneñ dä atışlarnı tuqtatruına ömetlänep barabız. Alar atışlarnı däwam itkän oçraqta koalitsiä köçläreneñ härwaqıt üz üzlären saqlaw xoquqı bar.

Britaniädäge xärbi analitik Tim Garden Ğiraq İdarä Şurası, bigräk tä xakimiätne 30-nçı iyündä ğiraqlılarğa tapşıru waqıtı yaqınlaşa barğanda xäzer bik qıyın xäldä qaldı di:

AUDİO: 30-nçı iyün, xakimiätne tapşıru köne yaqınlaşqanda, minemçä alar xäzer bäysezlek däräcäsen häm üzläreneñ Ğiraq xalqın xörmät itüen kürsätergä kiräk ikänen añlıy. Şunsı borçulı, AQŞ xärbiläreneñ taktikası tağın da kübräk ğadi ğiraqlılarnı köç qullanunı yaqlarğa etärä. Ägär dä bu artıq ozaq däwam itsä, ägär dä Ğiraq İdarä Şurası Amerikanıñ ğämällären yaqlasa Şura Ğiraq xalqına bulğa qädär tayanıçın da yuğaltaçaq. Şulay itep isemen almaştırğan küçeş çorı xökümätenä, ä anda çınlıqta näq xäzerge keşelär bulaçaq, alarğa xakimiätne tapşıru ber dä alğa taba adım bulıp kürenmiäçäk.

AQŞ räsmiläre bu bäreleşlärne uzğan yılnıñ may ayında Ğiraqta zur bälereşlär tämamlanğannan soñğı iñ qatı bäreleşlär dip atadı. AQŞ citäkçelegendäge köçlär sönni ğisyançılarğa qarşı ğına tügel, suğışçan şiği din ähele Moqtada äs-Sadr tarafdarlarına qarşı da suğışa. AQŞ däwlät sekretare Colin Powell bu atna bik qıyın atna buldı dide:

AUDİO: Soñğı könnärdä bez moñarçı kürmägänne kürdek. Häm min xäzer mondıy närsälär bulır dip ber dä kötmägän idem. Ämma ni genä bulmasın, minemçä bezneñ xärbi citäkçelär monı añlıy häm başqarıp çığaçaq dip isäplim.

Powell AQŞ haman da xakimiätne 30-nçı iyündä tapşırırğa cıyına dip belderde.

Ämma xärbi analitik Garden fikerençä, Ğiraq İdarä Şurası belän Waşington arasındağı fiker ayırmalıqları xakimiätne tapşırunı qıyınlaştıra, häm ul kiçekterelergä dä mömkin.

Naif Aqmal, Praga.
XS
SM
MD
LG