Accessibility links

Кайнар хәбәр

Kosmosqa oçu nindi millätlärgä nasıyp?


12 aprel' - aviatsiä häm kosmonavtika köne Tatarstan häm tatarlar öçen härwaqıt üzençälekle buldı. Eş kosmosqa berençe tapqır kütärelgän Gagarin turında şayartıp Tatarın dip yörtüdä genä tügel. Awılda üskän tatar yegetläre ni öçender yä diñgezdä säyäxät itü, yä kükkä kütärelü turında xıyallana. Kosmosnı üzläşterü häm oçışlarğa tatarlarnıñ öleşe şaqtıy zur. Kosmosqa oçarğa äzerlänüçe berençe törkemdä tatar yegete Mars Rafiqovnıñ buluı, Buran korablendä oçarğa öyränüçelär arasında Başqortstanda tuıp-üskän Ural Soltanovnıñ iñ berençelärdän äzerlänüe, kosmik korablne äzerläwdä tatar häm başqort wäkilläreneñ buluı şunı dälilli. Döres, bezneñ xalıq wäkillärenä dönya şawlatıp kosmosqa kütärelü nasıyp bulmadı. Läkin monıñ säbäpläre başqa. Annarı, Qazanda ataqlı ğalim Sergey Korolev häm başqa belgeçlärneñ yäşäp, fänni açışlar yasawı, İdel buyı respublikalarındağı sänäğät şirqat'lärendä kosmos öçen kiräkle cihazlar çığarıluı turında da onıta almıybız. Qazan häm Ufa aviatsiä institutlarında nindi injenerlar äzerlänüen dä beläsezder. Tatarstan xökümäte başlığı Röstäm Miñnexanov Kosmonavtika köne belän respublika xalqın täbrik itep, möräcäğät tarattı.
Putin çınlap ta demokratiäne yaqlıymı?
Düşämbe könne Rusiä prezidentı Vladimir Putin Rusiä xökümäte äğzäläre belän oçraşuında küptän tügel Duma qabul itkän ber qanunnı tänqitläp çıqtı. Demonstratsiälär ütkärügä çikläwlär quyuçı älege qanun proyektın Putin tarafdarlarınnan torğan xakimiät firqäse Berdäm Rusiä wäkilläre äzerlägän. Qazanda yäşäwçe radiojurnalist Cäwdät Äminev Dumadağı tatarstan deputatı Mixail Roketskiy belän söyläşkän. Deputat älege qanun proyektınıñ urınsız, tile buluı turında beldergän.
Vladimir Putinnıñ demonstratsiälär iregen yaqlawı Berdäm Rusiä äzerlägän häm kütärep çıqqan proyektnı tänqitläwe anıñ demokratik häm liberal' qimmätlär yağında buluın kürsätä. Bälki ul näq şul maqsattan çığıp ul adımnı yasağandır. Ä bälki - xakimiätkä kilgän zur partiä eçendä törle qaraşlı, xätta qara-qarşı fikerle säyäsätçelär buluın raslıydır älege kötelmägän waqiğa.
Cırlamauçı cırçılarnı qayda tıñlarğa?
Xäzer estrada cırçıları küz aldında. Ä menä tatar klassikasın başqaruçı cırçılarnı qayda işetergä? Musa Cälil teatrında eşläwçe yoldızlar Zilä Sönğatullina, Venera Ğanieva, Säit Räinbäkov kebek cırçılar qatnaşqan opera spektaklläre bulmağaç, klassik äsärlär, romanslar siräk işetelä. Düşämbe könne şundıy cırçılarnıñ berse - Ruslan Däminov başqaruında ariälärne, tatar muzıkal' spektakllärennän özeklär, rus häm çit il klassikasın tıñlaw nasıyp buldı. Anıñ icatına 30 yıl tuluğa bağışlanğan kiçä Zur konsertlar zalında buldı. Ä menä fol'klor, tatar xalıq cırların başqaru buyınça dan alğan Flera Söläymanovanıñ yubiley konsertı şimbä könne filarmoniä zalında ütte.
Rimzil Wäli, Qazan.
XS
SM
MD
LG