Accessibility links

пәнҗешәмбе, 8 декабрь 2016, Казан вакыты 12:54

Flera Söläymanova 65 yäşen bäyräm itte


Şimbä könne Ğabdulla Tuqay isemendäge Tatar däwlät filarmoniäseneñ konsertlar zalında uzğan Milli sanduğaç dip isemlängän ädäbi-muzıkal’ kiçä Tatarstannıñ atqazanğan artistkası Flera Söläymanovanıñ yubileyına bağışlandı. 65 yıl elek ul Kama tamağınıñ İske Barış awılında dönyağä kilä. Şuşında uq 8 yıllıq mäktäpne dä beterä. Annan soñ Flera xanım Qazanğa kilä. Läkin monda anı säxnägä ciñel yul kötmi. Bulaçaq cırçı kiez basu fabrikasında eşli, şul uq waqıtta kiçke mäktäptä belem ala. Läkin cırğa, sänğätkä mäxäbbät üzeneken ala. Flera Söläymanova Qazannıñ Maksim Gor’kiy isemendäge Mädäniät yortında eşläp kilüçe xorda cırlıy başlıy. Qıznıñ tawışın, cır-moñğa birelüen kürep, xornıñ citäkçese bulğan Sara Sadıkova aña üz köçen Qazaqstanda eşläp yörüçe cırçılar brigadasına sınarğa täqdim itä. Şulay itep, Flera xanım 3 yıl däwamında Qazaqstan tamaşaçıları aldında çığış yasıy. Annan qaytqaç, cırçını icat yulı Sember filarmoniäsenä alıp kilä. Ul şulay uq Tatarstan radiosında da xezmät itä. 1971 yıldan Flera xanım Ğabdulla Tuqay isemendäge Tatar däwlät filarmoniäsendä eşli başlıy. Häm anda 20 yıl däwamında tatar cırın, tatar sänğäten yaratuçılarğa xezmät it. 1983 yılda ul Tatarstannıñ atqazanğan sänğät eşleklese digän maqtawlı isemgä layıq bula. Şundıy qızıqlı häm sänğätkä birelgän yazmış, icat yulı xaqında süz bardı 10 apreldä uzğan yubiley kiçäsendä. Şulay uq anda Flera Söläymanovanı qotlarğa anıñ dusları, yaqtaşları, yaqınnarı da kilgän ide. Milli sandiğaç isemle bäyräm konsertında da mondıy cılı süzlär, matur teläklär küp yañğıradı. Anna tış, cırçı xörmätenä İskändär Biktahirov, Rabiğa Sibğatullina, Aydar Fäyzraxmanov häm anıñ citäkçelegendäge däwlät fol’klor muzıka ansamble, Räzin Nurullin, Soltan Şihapov, Färit Xatipov, Kiram Satiev çığış yasadılar. Flera xanım da kiçägä kilgän tamaşaçılarnı tağın ber qat üzeneñ moñlı tawışı belän quandırıp, küpsanlı cırlar täqdim itte.

Gölnaz İlgizär

XS
SM
MD
LG