Accessibility links

чәршәмбе, 7 декабрь 2016, Казан вакыты 23:31

Qatarda Yandarbievnı üterüdä ğäyeplänüçe Rusiä küzläw agentların xökem itü başlandı


Qatar başqalası Dohada Çeçnyanıñ elekke prezidentı Sälimxan Yandarbievne üterüdä ğäyeplänüçe Rusiäneñ ike küzläw agentın xökem itü başlandı. Yäkşämbedä ütkän berençe mäxkämä utırışında alarğa räsmi ğäyepläwlär belderelde. Rusiälelär ğäyeple buluların kire qağa. Ul arada Qatarnıñ mäglümät çaraları Yandarbievnıñ üterelüe artında Rusiäneñ saqlanu ministrı toru ixtimalın xäbär itä.

Çeçnyanıñ elekke prezidentı, soñğı 3 yılda Qatar başqalası Dohada yäşägän Sälimxan Yandarbiev 2 ay elek, fivralneñ 13-ndä comğa namazınnan soñ mäçettän çığıp maşinasına utırğanda yañğırağan şartlaw näticäsendä xäläk buldı. Anıñ belän bulğan 13 yäşlek ulı Dawıt cäräxätlär aldı. 6 könnän Qatarnıñ maxsus xezmätläre 3 Rusiälene toqarladı. Berse, Rusiä ilçelege särkätibe Aleksandr Fetisov bulıp çıqtı. Diplomat statusına iä bulğan bu keşene Qatar räsmiläre ber aydan cibärergä mäcbür buldı. Döres, monıñ aldınnan prezident Putin telefon aşa Qatar ämire belän söyläşte. Ä Mäskäwdä Qatarnıñ qulğa alınğan ike sportçısı azat itelde. Qalğan ike Rusiälene Qatarlılar Yandarbievne üterüdä ğäyepläde. Politsiä mäglümätenä qarağanda alarnı şul comğada Yandarbiev maşinası yanında kürgännär. Mart başında Washington Post gäzite bu ike keşe ğäyeben tanığan, dip yazıp çıqtı, läkin soñraq, Mäskäwdän advokatlar kiläsen işetkäç, belderülärennän baş tartqannar. Rusiä räsmiläre bu ike keşeneñ küzläw agentları buluın tanısa da, alarnıñ Yandarbievne üterergä cibärelüen kire qaqtı. Soñğı köngä qädär alarnıñ isemnäre bilgesez ide. Nixayät, yäkşämbedä, isemnäre mäglüm buldı. Rusiäneñ mäglümät çaraları ğäräp yazılışınnan çığıp, alarnı Anatoli Vladimiroviç Belaşkov häm Vasili Anatolieviç Bokçov, dip atıy.

Mäxkämäneñ berençe utırışı ber säğät çaması barğan. Utırışnı alıp barğan 3 xäkim, ğäyepläwçe, advokat, saqçılardan tış, anda Rusiä ilçelege wäkile dä qatnaşqan. Başta xäkimnär ğäyeplänüçelärdän, kameradağı şartlarğa zarlanmıysızmı, dip sorağan. Tegelär "yuq" digän. Şunnan soñ prokuror Saadi Äl-Dusari ğäyepläw süze belän çığıp, barlığı 9 ğäyepläw beldergän, şul isäptän: Qatar cirenä qanunsız ütep kerü, diplomat poçtası aşa ilgä şartlatqıç matdä kitertü, waxşilärçä üterü, terror ğämäle oyıştıru, nixayät, möselmannar öçen izge zölxicä ayında qanu qoyunı oyıştıru. Äl-Dusari bu ğäyepläwlärne isbatlarlıq dälillär buluın, ant astında raslarlıq şahitlär buluın äytkän. Şunnan soñ ğäyeplänüçelärgä, ğäyebegezne tanıysızmı, digän soraw birelgän, alar – "yuq" digän. Mäxkämä tarafınnan bilgelängän advokat Möxsän Äl-Suwäydi, ğäyepläwlärne öyränü öçen waqıt sorağan. Baş xäkim İbrahim Salix Äl-Nisf aprilneñ 25-nä qädär tänäfes iğlan itkän.

Ul arada düşämbedä Qatarnıñ Är-Raya gäzite ber qaynar xäbär tarattı. Gäzit yzuınça, prokuror beldergän mäglümätlärdä, Rusiä saqlanu ministrı da telgä alına ikän. Yänäse, Sergei İvanov ilçelektä eşlägän ber maxsus xezmät wäkilenä, ike agent belän bergä bu ğämälne oyıştırırğa üze quşqan. Rusiäneñ saqlanu ministrlığı bu xäbärne qatğıy räweştä kire qaqtı. İvanovnıñ matbuğat wäkile Väçeslav Sedov bu xäbärne safsata dip atadı, häm bu safsatağa añlatma birä almıym, dip belderde. Rusiä yağı bu ike keşene azat itergä taläp itä. Qatar yağı älegä bireşmi. Mäxkämä utırışı tağın 2 atnadan däwam iter dip kötelä

Ali Gilmi, Praga
XS
SM
MD
LG