Accessibility links

сишәмбе, 6 декабрь 2016, Казан вакыты 15:06

Kirov ölkäsendä Tatar mäğärife könnäre ütä


Tatarstannıñ Mäğärif ministrlığı Rusiäneñ tatarlar kümäkläşep yäşägän töbäklärendä Tatar mäğärife könnären ütkärep kilä. Alarnıñ maqsatı – tatarlar küpläp yäşi torğan cirlärdä tuğan telneñ däräcäsen kütärü, tatar telendä belem birüçe mäktäplärgä metodik yärdäm kürsätü, alarnı däresleklär belän tä’min itü, uqıtuçılarnı häm uquçılarnı yaña metodikalar, yaña uqu-uqıtu texnologiäläre belän tanıştıru, Tatarstan Mäğärif ministrlığı häm tege yäki bu töbäkneñ mäğärif citäkçelege arasında xezmättäşlek turında kileşü tözü genä tügel. Älege çara qısalarında şulay uq törle töbäklärdä yäşäwçe millättäşlärebezneñ xäle belän tanışu, cämäğätçelek belän oçraşu, törle mädäni çaralar, tatar belän aralaşunı oyıştıru da qaralğan. Mäğärif ministrlığına bu eştä respublikanıñ sänğät ostaları, üzeşçän kollektivlar, yazuçı häm şağirlät dä bulışa. 14-15 aprel’dä Kirov ölkäsendä uzaçaq Tatar mäğärife könnärendä dä ministrlıq wäkilläre genä qatnaşmıy. Bu yulı Tatar mäğärife könnäre Kirov ölkäseneñ tatarlar küplär yäşi torğan ike rayonında - Malmıj häm Noqrat alanı rayonnarında ütäçäk. Şulay uq törle çaralar uzdıru Noqrat Alanı şähärendä dä planlaştırıla. Älege xaqta Mäğärif ministrlığınıñ töbäklär belän eşläw bülege citäkçese Änisä Morozova söyli. Änisä xanım Kirov ölkäsenä üze dä cıyına.

Bu könnär qısalarında bez uqu yortlarında bulaçaqbız, respublikanıñ Mäğärif ministrlığı häm Kirov ölkäseneñ mäğärif departamentı arasında kileşü töyiäçäkbez, tatar cämäğätçelege öçen törle oçraşular oyıştıraçaqbız. Tatarstannan bara torğan delegatsiädä deputat häm yazuçı Tufan Miñnullin, respublikanıñ Ministrlar Kabinetı wäkile Kim Miñnullin, mäğärif ministrlığı wäkilläre bar. Tatar mäğärife könnärendä Mäğärif ministrı Fariz Xarisov ta qatnaşırğa tieş. Şulay uq Kirov ölkäsenä Baltaç häm Quqmara rayonnarı wäkilläre dä cıyına. Alar inde berniçä yıl Kirov ölkäseneñ Noqrat Alanı häm Malmıj rayonnarı mäğärif oyışmaları belän bergä eşlilär

Şulay uq Änisä Morozova Azatlıq radiosı tıñlawçılarına Kirov ölkäsendäge tatar mäğärif oyışmaları xaqında da beleşmä citkerä.

Kirov ölkäsendä tatarlar näq menä şuşı ike rayonda kümäkläşep yäşi. Anda 8 tatar mäktäbe bar, alarda 620 uquçı belem ala. Bu mäktäplärdä tatar telendä uqıtu kübräk başlanğıç mäktäptä alıp barıla, ä inde ölkän klasslarda tatar tele fän bularaq kertelä. Ölkädä 28 tatar tele uqıtuçısı eşli. Şulay uq ölkädä 6 balalar baqçasında tatar gruppaları eşläp kilä

Tatarstan delegatsiäse yulğa çärşämbe könne irtük çığaçaq. Bu yulı inde uylanılğan çara tögäl ütär, di Änisä xanım. İsegezgä töşerep ütik, Tatar mäğärife könnäre Kirov ölkäsendä 7-8 aprel’gä planlaştırılğan ide. Läkin ölkä citäkçelege sorawı buyınça alar kiçekterelde. Nihayät, 14-15 aprel’ könnärendä andağı millättäşlärebez Tatar mäğärife könnärendä qatnaşa alaçaq.

Gölnaz İlgizär

XS
SM
MD
LG