Accessibility links

якшәмбе, 11 декабрь 2016, Казан вакыты 07:17

Ğiraq ğisyançıları çit il watandaşların totıq itep alu taktikasına küçte


Ğiraqta totıq itep alınğan çit il keşeläre inde distälär belän isäplänä. Nigezdä ğisyançılar koalitsiä kergän illärneñ watandaşların awlıy. Läkin, alarnıñ qulına xata belän başqa il keşeläre dä elägä. Düşämbe kiçendä Rusiäneñ Ğiraqta eşläwçe ber energiä şirkäteneñ 8 xezmätkäre totıq itep alındı. Soñraq alar cibärelde. Ä menä 3 çex jurnalistı häm 3 yapon watandaşınıñ yazmışı äle dä bilgesez bulıp qala.

Ğiraqtağı ğisyançılar çit il keşelären "totıq itep alu" ğämälenä küçte diergä bula. Alarnıñ berençel xädäfläre, älbättä, koalitsiägä kergän illärneñ watandaşları. Ämmä, yätmägä teläsä kem elägä ala, küräseñ, totıq alğanda pasportlarnı tikşerep tormıylar. Şulay, düşämbe kiçendä Rusiäneñ Ğiratqa eşläwçe İnterenergoservis şirkäteneñ 8 xezmätkäre totıq itep alınğan. Bu şirkät Bagdad tiräsendä ekektr stansiäsen tözekländerü belän mäşğül. Cirle waqıt belän kiçke 7-lärdä ike distä qorallanğan keşe Bagdadta eşçelär yäşägän yortqa kilep andağı 12 keşeneñ 9ın üzläre belän alıp kitkän. Ölkän yäştäge, 4 balası bar dip zarlanğan bersen şunduq cibärgännär. Qalğan 8-en – ikençe köngä irtä belän. Totıqlar üzläre äyütençä, alarğa yaxşı mönäsäbät kürsätelgän. Ber tön yqolamadıq, beraz arıdıq, şul ğına di alar:

Audio (Ğiratqağı Rusiä xezmäre)

İnterenergoservis şirkäteneñ bu xezmätkäre eşebezne däwam itäçäkbez disä dä, şirkätneñ citäkçeläre xäzer eşçelärne Ğiratqan çığaru yulların tikşerä. Bu şirkätneñ Ğiraqta 370-läp xezmätkäre bar. Ğiratqağı Rusiä watandaşları isä 600 çaması. Tışqı eşlär ministrlığı xäzer alarnı da çığaru turında uylana.

Bilgele bulğança, Rusiä koalitsiägä kermi, Ğiraq suğışına qarşı çıqqan ide. Küräseñ ğisyançılar, monı iskä alğan. Düşämbedä totıq itep alınğan 7 Qıtay watandaşı, şulay uq cibärelgän ide. İnterenergoservisnıñ totıq itep alığnğan 8 xezmätkärneñ 3-e Rusiädän, qalğan 5-e Ukrainadan. Ukraina Ğiraqqa ğäskär cibärgän il. Ämmä ğisyançılar moña iğtibar itmägän, axrı.

Ul arada amerikan generalı Ricardo Sanchez süzlärençä, Quşma Ştatlarnıñ 2 xärbie häm Kellogg & Root isemle şirkätneñ 7 xezmätkäreneñ yazmışı älegäçä bilgesez. Ğiratqa tözekländerü eşläre alıp barğan bu şirkätneñ törkemenä uzğan atna axırında Äbü Ğörip yanında xöcüm itelgän ide.

Düşämbedä Çexiäneñ Bagdadtağı ilçelege 3 çex jurnalistınıñ yuqqa çığuı turında xäbär itte. Taxi yörtüçese äytüençä, Bagdadtan İordaniägä taba yulğa çıqqaç, Falluca tiräsendä alarnı qorallı keşelär tuqtatqan häm 3 çex jurnalistın üzläre belän alıp kitkän. Çexiäneñ Ğiraqtağı ilçese Martin Klepetko, Azatlıq radiosına, älegä alar öçen ber taläp tä quyılmadı dide:

Audio (Martin Klepetko)

"Älegä ber xäbär dä yuq, totıq itep alınğanmı alar, kem tarafınan alınğan, nindi şartlarda totılalar – belmibez."

Kiçkä taba Çexiäneñ Tışqı eşlär ministrı Cyril Svoboda, çex watandaşları isän digän ğäyre-räsmi xäbärlär bar, läkin östämä bernindi mäglümät yuq, Çexiäneñ Ğiraqtağı häm kürşe illärdäge wäkilläre tikşerü eşläre alıp bara, dide.

Uzğan atna totıq itep alınğan 3 Yapon watandaşınıñ yazmışı älegäçä bilgesez bulıp qala. Üzlären Möcähetdin brigadası dip atağan suğışçılar, ägär Yaponiä Ğiraqtağı xärbilären çığarmasa bu 3 keşene tereläy yandıru belän yanağan ide. Yaponiä premier-ministrı Junichiro Koidzumi bu taläpne kire qaqtı. Totıqlar ğailäläreneñ wäkile Naoya Ohira, xökümätne ğisyançılar taläben ütärgä, 550 yapon xärbien Ğiraqtan çığarırğa çaqırdı:

Audio (Naoya Ohira)

"Bez äle dä üz fikerebezdä torabız. Totıqlarnıñ ğailäläre bik nıq arıdı, alar yärdämgä moxtac."

Yaponiä imperatorı Akihito totıqlarnı kiçekmästän cibärergä çaqırdı. Bu turıda ul Tokioda Quşma Ştatlar vitse-prezidentı Dick Cheney belän oçraqşaç äytte. Cheney, Yaponiäneñ ğisyançılar taläbenä birelmäwenä xuplaw belderde häm totıqlarnı azat itüdä yärdäm wäğdä itte:

Audio (Dick Cheney)

"Bezneñçä, yapon premier-ministrı döres yul sayladı. Bezneñ xökümätlärneñ qurıqmawı, terrorçılarnıñ bu ğämälläre belän bezneñ säyäsätebezgä yoğıntı yasawına yul quymawı – bik möxim. "

Ul arada soñğı xäbärlärgä qarağanda Ğiratqa 4 İtalia watandaşı totıq itep alınğan. Äl-Cäzirä telekompaniäse belderüençä, totıq aluçılar İtaliä ğäskärlären Ğiratqan çığarırğa taläp itä.

Ali Gilmi, Praga
XS
SM
MD
LG