Accessibility links

Çeçnädä Qadırov militsiäseneñ role


Mäskäv yaqlı Çeçnä prezidentı Ahmed Qadırov ilne Russiä xärbiläre häm üzeneñ mäxsus militsiäse yardämendä idarä itä. Qadırov köçläre xätta Russiä xärbilärennän dä räximsezeräk. Şuşı köçlärneñ nindi dä bulsa statutınıñ bulmauı säbäple, ul kiläçäktä federal xökümät öçen dä problemmalar tudıra ala.

Çeçnä prezidentı Ahmed Qadırov ildä yañadan iminlek urnaştırırğa väğdä itte. Läkin, anıñ üz militsiäse köç qullanuda ğäyeplänä. Russiä Eçke eşlär ministerlege tarafınnan iğlan itelgän mäğlümätlärgä qarağada , uzğan yılda ğına da Çeçnädä 600 keşe urlanğan, alarnıñ 51-e genä azat itelgän. Keşe xoquqların yaqlau oyışmaları bu sannar döreslekne çağıldırmıy dip belderälär. Memorial oyışması üze eşli alğan Çeçnä territoriäseneñ 30 protsentlıq öleşendä genä dä 492 keşe urlanğan ide. Keşe urlau häm tınıç xalıqqa qarçı köç qullanunıñ töp cavaplısı Qadırov militsiäse dip belderde. Qadırov militsiäseneñ nindi däräcädä köçle buluı häm anıñ kiläçäktä nindi rol uynayaçağın farazlau qıyın. Şulay da ul bügenge köndä Çeçnädäge Russiä xärbiläre häm çeçen köräşçeläre belän bergä töp rol uynıy. Mäskäv Carnegie Üzägeneñ politik küzätüçese Aleksey Malaşenkonıñ fikerençä, Qadırov militsiäse yaxşı qorallanğan häm anıñ nigezen elekke köräşçelär täşkil itkännektän, anıñ suğış täcribäse bar. Alarnıñ tögäl sanı bilgele bulmasa da, prezident Ahmed Qadırovnıñ ulı Ramazan citäklägän ul köçlär iñ kimendä 4 meñ köräşçedän tora dip xisaplana. Federativ xakimiät strukturasında andıy köçlärneñ statutı yuq. Kreml älbättä, ul köçlärne üz kontrolenä alırğa telär ide, läkin, respublikada bäreleşlär dävam itkän möddätçä bu mömkin bulmas kebek. Malaşenkonıñ süzlärençä, şuşı militsiädän Russiä mäxsus köçlärenä qarağanda da küberäk qurqıla.

Audio

Qadırov militsiä xäzerge şartlardan faydalanıp, Qadırov qäbiläseneñ mänfäğätlären yaqlauçı köç bularaq xäräkät itä. Anı Çeçnä prezidentınıñ xosusi armiäse dip atap bula. Mäskävdäge Politik texnologiä üzägeneñ analizçısı Aleksey Makarkinnıñ belderüenä qarağanda. köçlärneñ başlığı prezident Qadıovnıñ ulı Ramazan , keşe urlauda häm tınıç xalıqnı cäberlävdä genä tügel, ä üz avılında xosusi törmä buldıruda da ğäyeplän

Audio

Qadırov köçläre közen parlamentqa bulaçaq saylaularda xakimiät köräşendä aktiv rol uynayaçaq. Malaşenkonıñ fikerençä, Qadırov köçläre Kreml öçen kiläçäktä problemma tudıra ala. Çeçnädäge Russiä xärbiläreneñ ofitserları Çeçennärdän genä torğan Qadırov militsiäseneñ beldegençä xäräkät itüenä qarşı. Alarnıñ fikerençä, Qadırovnıñ säyäsäte , Çeçnäneñ bäysezlegen iğlan itkän Coxar Dudayev säyäsäten iskä töşerä ul bäysez prezident kebek qılına da inde. Makarkin monıñ belän kileşmi, Çeçnädä xakimiät Qadırov tügel, ä Russiä armiäse qulında digän fikerdä.

Audio

Anıñ süzlärneçä, Russiä köçläre bulmasa , Çeçnädäge xäzerge xakimiät sisteması cimereler ide. Här närsä ber genä nigezgä tayana- ul da bulsa Russiä xärbi köçlärenä.

Färit İdelle, Praga.
XS
SM
MD
LG