16ncı aprel' könne Qazannıñ Gor'kiy muzeenda Origami kürgäzmäse açıldı. Anı Saqura - tatar-yapon mädäni-xäbär üzäge oyıştırdı. Saqura üzäge Qazanda inde 8 yıl däwamında uñışlı ğına itep eşläp kilä. Yaponiä kebek dön'yaküläm aldınğı il belän xezmättäşlek itü, qazanlılar öçen, älbättä, zur fayda kiterä. Saqura üzäge küp kenä mädäni çaralar uzdırdı. Şulay uq käsep ölkäsenä bağışlanğan seminarlar oyıştırıldı. Älege üzäk yärdäme belän Qazannıñ pedagogika universitetında 6 yıl däwamında yapon uqıtuçısı studentlarğa yapon telen öyrätä. Ä xäzer Origami kürgäzmäse turında tulıraq xäbär.
Origami sänğate belän Yaponiäneñ üzendä xäzerge waqıtta bik qızıqsınmıylar. Ämma Qazanda häm çit illärdä Origami - qıyağazdan törle sınnar yasaw sänğäten - bik yaratalar. Qazanda bu kürgäzmä inde 3nce tapqır oyıştırıla. Älegesen oyıştıruda Germaniä, Almaniä häm Yaponiä kebek çit il mämläkätläre dä qatnaştı.
Kürgäzmäne açu tantanasına kübräk balalar kilde. Tamaşaçığa iñ berençe Origami sänğäteneñ riwayäte kürsätelde. Törle yäştäge balalar qatnaşqan açıq tösmerlär belän bizälgän bu çığışnı qaraw üze ber bäyräm ide. Bik küp yıllar elek Yaponiädä yäşägän çirle prinsessa däwalanır öçen meñ torna yasağan riwayätne belmägän adäm yuqtır. Ämma şuşı tornalardan ğına başlanğan şöğel', Origami kebek çın matur sänğätkä äwerelde. Bik küp törle çäçkälär, canwarlar, äkiät personajları, törle näqıyşlär kertelgän älege kürgäzmäne Gor'ki muzeenıñ öç bülmäsenä sıydırğannar.
İñ keçkenä balalardan başlap, çın ostalarğa qädär Origami sänğäte belän qızıqsınuçılar bik küp. Qızıqsınuçılarnıñ artuı Origaminıñ sälämätlekkä bulğan faydası belän dä hiçşiksez bäyle. İnvalid bulğan keşe, älege sänğät belän daimi şöğellänep, üzenä däwa kiterä. Ä ölkän buın keşeläre şuşı sänğät aşa xätta yäşärep tä kitälär.
Äytergä kiräk, qıyağazdan törle sınnar yasaw belän Qazanda ğına tügel, ä İspaniä, Koreya, Qıtay yaqlarında da yaratıp şöğellänälär. Saqura üzägeneñ citäkçese Asıya xanım Sadıyqova beldergänçä, Origami kürgäzmäsen oyıştıruda 117 keşe qatnaştı, ä inde yasalğan sınnarnıñ sanı meñgä yaqın. Qazanda kürsätelgännän soñ, älege kürgäzmä Yoşqar-Ola şähärendä oyıştırılaçaq – dip äytte Asıya xanım.
Rusiägä böyek rus yazuçısı L.Tolstoy alıp qaytqan bu sänğätneñ Qazanda yäşäwenä uzğan yılda yöz yıl tuldı. Çınlap ta xalıq öçen nindi dä bulsa fayda kiterä torğan ğämäl barı tik ixtiram belän genä qabul itelergä tieş. Häm Saqura üzäge barı tik şundıy eşlär genä başqara.
Bu comğada tatar mädäniätendä tağın ber zur waqiğa buldı. Böyek tatar şağire G.Tuqaynıñ tuğan köne uñayınnan Qazannıñ VKNİİVOLT şirkätendä Tuqaynıñ häykäle qoyıldı. Häykälne şomartıp, äzerläp betergännän soñ anı, şağirneñ tuğan yağı bulğan, Arçağa quyarlar. Bu yäkşämbedä Sankt-Peterburgta Tuqay tormışına häm icatına bağışlanğan seminar uzaçaq. Ä 26ncı aprel' könne, näq şağirneñ tuğan könendä, Qazanda räsmi räweştä berençe tapqır “Tuğan tel” bäyräme ütkäreläçäk.
Al'bina Zäynulla, Qazan.
