Accessibility links

Кайнар хәбәр

Citäkçelär mutlaşa - ğadi oçuçılar oçnı oçqa yalğıy


«Başqortstan hawa yulları» şirkäte citäkçelege belän biredäge oçuçılar kollektiwı hönär berlekläre arasında ike atna çaması elek başlanğan tartqalaş haman da xäl itelmäde. İnde xäbär itelüençä, oçuçılar hönär berlekläre 2004 yıl öçen üzläre äzerlägän kollektiv Kileşüne «Başqortstan hawa yulları» awiaqompaniäse citäkçelege qabul itmägäç, ike arada mönäsäbätlär şaqtıy kiskenläşkän ide. Oçuçılar üzläreneñ xezmät xaqınıñ az buluın, sotsial yaqlanğanlıqnıñ tieşle däräcädä bulmawın kürsätep, xezmät şartların yaxşırtu häm aylıq eş xaqın kütärüne taläp itte. Ämma bu taläplärne citäkçelek şunda uq kire qaqtı. Şul xäldän soñ oçuçılar üzläreneñ täqdimnäre qabul itelmägän oçraqta eş taşlayaçaqların beldergän ide. Andıy belderüdän soñ hawa yulları şirkäte türäläre hönär berlekläre belän yañadan söyläşülär başlarğa mäcbür buldı. Ämma oçuçılarnıñ hönär berlege wäkilläre belän soñğı könnärdä barğan söyläşülär bu yulı da uñay näticä birmägän, çönki awiaqompaniä citäkçeläre taşlamalarğa barudan tağın baş tartqan. Xäzer inde oçuçılar hönär berlege aldağı könnärdä nindi adımnarğa baraçaq? Alar aldan iskärtep quyğança eş taşlawlarğa kereşmäsme? Şuşı sorawlarğa cawap alu öçen, «Azatlıq» radiosı xäbärçese «Başqortstan hawa yulları» şirkäteneñ oçuçılar hönär berlege räise urınbasarı Vladimir Xolodovqa möräcägät itte. Ul bezgä tübändägelärne citkerde: "Eş taşlawlar bezneñ töp maqsat tügel. Awiatsiädä eş taşlawlarnıñ nindi näticälärgä kiteräçägen yaxşı añlap, bez bu aqsiäne iñ soñğı çikkä genä qaldırabız. Ä urtaq kileşügä tınıç yullar belän, östäl artında söyläşülär belän dä ireşergä ömetebezne özmibez. Döres, moñarçı şirkät citäkçeläre belän söyläşülär uñay näticä birmäde. Şuña da kiläse oçraşıp söyläşüne aldağı düşämbegä, 19 aprelgä bilgelädek." Vladimir Xolodov süzlärençä, «Başqortstan hawa yulları» şirkäte oçuçılar sostawı administratsiä aldına xäl itelmästäy taläplär quymıy. Barı tik alarnı çişü öçen ixtıyar häm teläk kenä kiräk. Soñğı yıllarda «Başqortstan hawa yulları» şirkäte eşçänlege körçekkä terälü däräcäsenä citte. Biredä citäkçelärneñ törle qırın ğämälläre açıqlanıp, küp şaw – şular bulğannan soñ, şirkät 2002 yılda Rusiä federäl milkenä küçerelgän ide. Xäzer anı xosusıylaştırırğa cıyınalar. Soñğı ike yılda «Başqortstan hawa yulları» şirkätendä oçuçılar sanı 50 protsentqa qısqartıldı. Oçqıçlar sanı da nıq kimede. Xäzer biredä TU – 154 häm TU – 134 marqalı nibarı 12 oçqıç isäplänä. Aları da iskerep betkän inde. Bügenge köndä respubliknıñ Eçke eşlär ministrlığı xezmätkärläre «Başqortstan hawa yulları» şirkäteneñ elekke häm xäzerge citäkçelegeneñ törle finans mutlıqların, urlaşuların tikşerü eşen däwam itä. Şulay itep citäkçelär üzläre räxätlänep balda – mayda yözä, ä ğädi oçuçılarnıñ xezmät xaqların az ğına kütärü öçen dä qır talaşıp yata.
XS
SM
MD
LG