Accessibility links

якшәмбе, 4 декабрь 2016, Казан вакыты 11:25

Maturlıq dönyanı qotqarır


Rus telendä çığış yasawçı artistlar Qazannıñ iñ zur zallarında şaw-gör kilep çığış yasıy. Fillip Kirkorov ber genä köngä Qazanğa kilep, Piramida üzägendä çığış yasağanda, modağa iärüçe yäşlär bilet bäyäsenä qarap tormastan, Piramidağa aşıqtı. Sovet zamanınnan uq tanılğan cırçı Sofiä Rotaru da tağın ber qat Qazannı ayuladı.
Şähärdä rusça diskotekalar, spektakllär, konsertlar görläp ütep tora.
Ä menä tatar tamaşaçıları beraz tıynağraq häm şaqtıy üzgä. Comğa kiçendä Tinçurin teatrında Xälil Mäxmütovnıñ yubiley kiçäse buldı. Ä çärşämbe könne onıtıla başlağan häm millätkä qaytıp kilüçe mäşhür cırçı Räşit Wahapov festivale açıla. Ämma bu könnärneñ iñ aktual' teması Tuqay, anıñ iseme, icatı, warisları. 26ncı aprel'dä, Tuqay tuğan köndä, bıyıl berençe tapqır räsmi räweştä “Tuğan kön” bäyräme ütkärelä. Milli cämäğätçelek şuşı bäyrämgä äzerlänä. İkençe yaqtan bıyılğı Tuqay bülägenä kemnär layıqlı bulır digän soraw bik küplärne dulqınlandıra, xätta bäxäsläşterä. Däğvaçelär arasında yazuçı Mirğazıän Yunıs, şağirlär Zinnur Mansurov, Lena Şağircan, kompozitor Şamil' Şärifullin häm başqalarnıñ här qaysısı büläkkä ömet itä.
Şuşı könnärdä Qazannıñ VKNİİVOLD institutında Ğabdulla Tuqayğa ör yaña häykäl qoyıldı. Şuşı yaña byust şomartıp eşkärtelgännän soñ Tuqaynıñ tuğan yağına - Arçağa quyılaçaq.
Qazan härwaqıtta da törle illärgä, başqa millät sänğätlärenä qızıqsınu belän qarıy. Yıraq illärdäge sänğät häm ğädätlär şähärdä tärbiälängän tatar keşelären bigeräk tä mawıqtıra. Mäs'älän yapon sänğäte häm yapon tele, ğöref-ğadätläre torğan sayın modağa kerep bara. Qazannıñ Ğor'kiy muzeenda Origami dip atalğan kürgäzmä açılu şaqtıy zur waqiğağa äylände. Anı Saqura – tatar-yapon mädäni-xäbär üzäge oyıştırdı. Saqura üzäge Qazanda inde 8 yıl däwamında uñışlı ğına itep eşläp kilä. Yaponiä kebek dönyaküläm aldınğı il belän xezmättäşlek itü, qazanlılar öçen, älbättä, zur fayda kiterä. Saqura üzäge küp kenä mädäni çaralar uzdırdı. Şulay uq käsep ölkäsenä bağışlanğan seminarlar oyıştırıldı. Älege üzäk yärdäme belän Qazannıñ pedagogika universitetında 6 yıl däwamında yapon uqıtuçısı studentlarğa yapon telen öyrätä. Ä xäzer Origami kürgäzmäse turında tulıraq xäbär.
Origami sänğäte belän Yaponiäneñ üzendä xäzerge waqıtta bik qızıqsınmıylar. Ämma Qazanda häm çit illärdä Origami - qıyağızdan törle sınnar yasaw sänğäten - bik yaratalar. Qazanda bu kürgäzmä inde 3nce tapqır оештырыла.
Kürgäzmäne açu tantanasına kübräk balalar kilde. Tamaşaçığa iñ berençe Origami sänğäteneñ riwayäte kürsätelde. Törle yäştäge balalar qatnaşqan açıq tösmerlär belän bizälgän bu çığışnı qaraw üze ber bäyräm ide. Bik küp yıllar elek Yaponiädä yäşägän çirle prinsessa däwalanır öçen meñ torna yasağan riwayätne belmägän adäm yuqtır. Ämma şuşı tornalardan ğına başlanğan şöğel', Origami kebek çın matur sänğätkä äwerelde. Bik küp törle çäçkälär, canwarlar, äkiät personajları, törle näqıyşlär kertelgän älege kürgäzmäne Gor'ki muzeenıñ öç bülmäsenä sıydırğannar.
İñ keçkenä balalardan başlap, çın ostalarğa qädär Origami sänğäte belän qızıqsınuçılar bik küp. Qızıqsınuçılarnıñ artuı Origaminıñ sälämätlekkä bulğan faydası belän dä hiçşiksez bäyle. İnvalid bulğan keşe, älege sänğät belän daimi şöğellänep, üzenä däwa kiterä. Ä ölkän buın keşeläre şuşı sänğät aşa xätta yäşärep tä kitälär.
Äytergä kiräk, qıyağazdan törle sınnar yasaw belän Qazanda ğına tügel, ä İspaniä, Koreya, Qıtay yaqlarında da yaratıp şöğellänälär.
Saqura üzägeneñ citäkçese Asıya xanım Sadıyqova beldergänçä, Origami kürgäzmäsen oyıştıruda 117 keşe qatnaştı, ä inde yasalğan sınnarnıñ sanı meñgä yaqın. Qazanda kürsätelgännän soñ, älege kürgäzmä Yoşqar-Ola şähärendä dä oyıştırılaçaq ikän.
Origami sänğäten kem häm qayçan alıp qaytqan soñ? İñ qızığı - bu sänğät belän böyek yazuçı Lev Tolstoy qızıqsınıp, anı Rusiägä alıp qaytqan. Kem belä, bälki yöz yıl elek tatar fälsäfäçese häm säyäsätçese Vaisov Yasnıy polyanada Tolstoy belän ös kön buyı fiker alışıp yatkanada, alar yapon häm tatar sänğätläreneñ urtaqlığın kürä alğannardır. Ä xäzer tatarnıñ üz yazmışı, yaponnıñ üz yazmışı.
Al'bina Zäynulla, Qazan.

XS
SM
MD
LG