Accessibility links

җомга, 9 декабрь 2016, Казан вакыты 10:47

Vladimir Pozner milli matbuğat turında tapşıru ütkärde


Comğa könne kiç, Qazanda küptän kötelgän waqiğa buldı. Tanılğan jurnalist Vladimir Pozner Qazanğa kilde häm cirle televidenie kanalında tapşıru ütkärde. «Efir» telekompaniäse studiäsendä televidenie xäbärçeläre cieldı. Çaqırılğan qunaqlar bulıp «Восточный экспресс», «Звезда Поволжья» gäzitläre möxärrirläre, xökümät räise urınbasarı häm «Yaña ğasır» telekompaniäse citäkçese cawaplar birep utırdı. Süz iregenä bağışlanğan şuşı tapşıruda milli jurnalistika turında da süz buldı. Vladimir Pozner, milli mäğlümat çaraları turında zurlap söyläşmäkçe ide, ämma tamaşaçılar häm çaqırılğan qunaqlar arasında bu mäs’äläne töptän belüçelär bulmadı. «Tatarça gäzitlär jurnalistik ostalıq yağınnan urısçadan qalışamı?» dip sorağan ide Mäskäw qunağı. «Звезда Поволжья» gäzite baş möxärrire Räşit Äxmätov :«Min tatarça belmim, läkin qalışa», dip cawap birde. Studiädägelär arasında milli matbuğatnı yaqlağan keşelär dä buldı. Mäsälän, «Tatarstan Yäşläre» gäziteneñ respublikada iñ yuğarı tirajlı buluın iskä töşerdelär. Auditoriä, milli televidenie turında söyläşkändä, «Yaña ğasır» kanalın misal itep qaradı. Studiädä aldan töşerelgän video tasma kürsätelde. Anda, ğadi ber tatar ğailäse, «Yaña ğasır» televideniese turında fikerläre belän urtaqlaşqan ide häm şuşı tasmada, tatarçağa tärcemä itelgän Meksika teleserialınıñ ber kisäge dä eläkte. Studiädä utıruçılar şuşı mizgeldä kölep cibärde. Şunnan, Vladimir Pozner «Nigä köläsez?» dip studiägä möräcäğät itte. Anda bulğan xökümät räise urınbasarı « Keşelärdä başqa millätlärgä qarata tüzemlelek citmi», dip borçılıp äytte. Annan başqa nigä kölgänen açıq itep añlatuçı bulmadı. TNV kanalı citäkçese «Çit il kinoların tatarçağa tärcemä itep, tıñlawçılar mänfäğätlären qayğırtabız», -dip cawap birde birüen.Süz iregenä kilgändä, Tatarstanda başqa ölkälärgä qarağanda bälkem ireklek kübräkter, ämma härber xäbärçeneñ eçke senzurası da küçle ikän. Axırda, tapşıruda qatnaşuçı ber jurnalist: süz irege bulğançı, xäbärçelärgä üzlärenä eçke ruxi ireklek citenkerämi, digän näticä çığardı.



Bikä Timerova.

XS
SM
MD
LG