Accessibility links

пәнҗешәмбе, 8 декабрь 2016, Казан вакыты 18:59

“Balqış”qa – 12 yäş


19 aprel’ könne Kärim Tinçurin isemendäge tatar däwlät drama häm komediä teatrında bik qızıqlı häm zur kiçä uzdı. Ul bilgele jurnalist Ğadilä Nurğalinıñ 55 yıllıq yubileyı häm ul alıp bara torğan Tatarstan radiosında efirğa çığuçı Balqış tapşıruına 12 yıl tulu uñayınnan oyıştırıldı. 90 yıllar başınnan uq comğa könnärendä çığıp kilüçe bu tapşırunı şuşı yıllar däwamında Ğadilä xanım alıp bara. Alay ğına tügel, ul Balqışnı buldırğan jurnalist ta äle. Üze dä dini tärbiä alğan Ğadilä, radioda möselmannar öçen programma äzerläw turında uylap yöri, läkin sovet zamanında bu xaqta xıyallanırğa ğına mömkin bula. Ä menä üzgärtep qoru yıllarında ul üz telägenä ireşä häm berençelärdän bulıp dini tapşıru oyıştıra. Bu xaqta Ğadilä Nurğali üze menä närsälär söyli.

Min bu tapşırunı oyıştırıp, isemen nindi itep quşarğa inde dip yörgändä, töş kürdem. Ap-açıq küktä bolıtlardan Balqış digän süz yazıldı. Şulay itep tapşıru Balqış digän isem aldı. Min xalqıbıznıñ balquına ömetlänep tä, şundıy isem birdem. Tapşırunıñ maqsatı – xalıqqa din turında söyläw, dini ğilem taratu. Balqış efirğa çıqqan 10 yıldan artıq waqıt eçendä min bu maqsatqa ireştem kebek

Kiçädä Ğadilä Nurğaligä Qayum Nasıyri isemendäge premiä dä tapşırıldı. Anı älege büläkne buldıruçı Mäğärif ministrlığınnan ministr Fariz Xarisov tapşırdı. Ul da kiçägä jurnalistnı qotlarğa kilgän ide. Ğadilä xanımnan tış bu premiä bilgele din ğalime Änwär Xäyrigä dä tapşırıldı. Şulay uq jurnalistqa möfti Rawil Ğäynetdin isemennän Ruxi berdämlek medale tapşırıldı. Kärim Tinçurin teatrında uzğan çarağa din ähelläre, Mädäniät, awıl xucalığı ministrlıqları wäkilläre, yubilyarnıñ yaqtaşları, Samar, Çuvaşiä häm başqa kürşe töbäklärdän Balqış tapşıruınıñ tıñlawçıları cıyılğan ide. Teatr binası tup tulı buldı, jurnalistnı qotlarğa, anıñ tapşıruı turında kübräk belergä teläwçelär xätta rätlär arasına quyılğan urındıqlarda utırdı. Çığış yasawçılarnıñ barısı da Balqış tapşıruınıñ ähämiäte, din turında döres, kiräkle mäğlümät taratuda zur role xaqında söylädelär, anı äzerläwçe jurnalistqa räxmätlären belderdelär. Ğadilä xanım, bernindi dä diärlek yärdämsez, berüzem oyıştırdım älege kiçäne, dip zarlansa da, Xalıq qına tügel, bu – balqış dip isemlängän kiçä bik matur, oyışqan räweştä uzdı. Şulay itep, Ğadilä xanım ireşkännäre belän genä qänäğätlänmiçä, kiläçäktä dä üz eşen däwam itärgä cıyına.

Gölnaz İlgizär

XS
SM
MD
LG