Accessibility links

Räşit Wahapov isemendäge cır festivalenä soñğı äzerlek çaraları kürelä


21 martta K.Tinçurin teatrında Räşit Wahapov isemendäge cır festivale açılaçaq. Sişämbe könne Tatar Kongressı binasında, şuşı çarağa bağışlanğan matbuğat oçraşuı uzdı. Räşit Wahapov isemendäge cır festivale başlanuğa sanawlı säğätlär genä qaldı. Festival, çärşämbe könne Räşit Wahapovnıñ icatına, tormış yulına bağışlanğan kitapnı täqdim itüdän başlanıp kitäçäk. Anıñ avtorı, «Tatarstan» jurnalı baş möxärrire Rifat Fättäxov, «Azatlıq» radiosında çığış yasap, festivalen ütkärü tärtibe turında söylägän ide inde. Sişämbe könne bulğan matbuğat oçraşuında ul cır festivalenä soñğı äzerlek çaraları xaqında xäbär itte. Anda qatnaşu öçen, Finländiä häm Başqortstan qunaqları Qazanğa kilep citkän inde, sişämbe könne kiç, Piterburdan, Ekaterinburdan tağın millättäşlärebezneñ kilüe kötelä. Açılu tantanasınnan soñ, festival’neñ saylaw turları tatarlar yäşägän töbäklärdä dä ütkäreläçäk. Şul isäptän Finländiädä dä. Alay ğına da tügel, sentäber ayında, Hel’sinki şähärendä, Räşit Wahapovnıñ icatına bağışlanğan fänni-ğämäli konferensiäne ütkärü dä planğa kertelgän. Sırğaç yaqlarınnan çıqqan fin tatarlarına Räşit Wahapov cırları tanış ta, yaqın da. Mäsälän, Ölkän xanım Alineñ äytüenä qarağanda, bu cırçı aña yäşlek yıllarınıñ iskä töşerä. Şuşı festival’dä yaratqan cırlarnı tağın ber qat tıñlaw häm qabat Qazannı kürer öçen Ölkän xanım, tormış iptäşe Abdulla äfände belän, tarixi watanına qaytqan.

Ölkän xanım Alineñ äytüençä, yaña buyın fin tatarları Räşit Wahapovnıñ icatın belep betermi. Ul, tatar yäşlären xalqıbıznıñ cır mirasına bu festival yärdämendä cälep itep bulır, digän ömet belderde.

Bikä Timerova.

XS
SM
MD
LG