Accessibility links

шимбә, 3 декабрь 2016, Казан вакыты 16:52

Quray belän Azatlıq radiosı xezmättäşlek turında söyläşä


21 aprel’ könne respublikada şaqtıy populyar bulğan Quray radiosında jurnalist Rimzil Wäli belän söyläşü buldı. Şunısın äytergä kiräk, Quray radiosı ul’tra qısqa dulqınnarda eşli başlağan berençe tatar radiosı. Anıñ beryulı tatar, rus häm çit il başqaruçılarnıñ muzıkasın aralaştırıp efirda yañğıratuı aña yäş tıñlawçılarnı cälep itärgä yärdäm itä. Rimzil Wäli belän söyläş.ne Säriä Tuqaeva alıp bardı. Rimzil äfände Säriä xanımnıñ da, Qurayğa şaltıratuçılarnıñ da küpsanlı sorawlarına cawap birde, söyläşüneñ tematikası da bik kiñ buldı. Tıñlawçılarnıñ berse – Rinat äfände – Rimzil Wälievkä Azatlıq radiosınıñ eşçänlegenä qağılışlı soraw da birde.

Xäzerge waqıtta bezneñ respublikanıñ suverenitetın qısalar, tormışlar qıyınlaşa bara. Bar ömet Azatlıq radiosına ide, läkin inde sez dä sovet radiosına oşap barasız, kübräk tege kolxozda küpme söt sawğannar, busında küpme it alğannar turında ğına söylisez

Azatlıq radiosı tıñlawçılar fikeren, alarnıñ täqdimnären isäpkä alıp eş itä. Läkin bu oçraqta bez Rinat äfändeneñ fikerläre belän bik kileşep betä almıybız. Qızğanıçqa qarşı, radiobızda awıl xucalığı, xalıq tormışı xaqında yazmalar, aktual söyläşü kiresençä citep betmi. Bez monı istä totıp, kiläçäktä xalıqnıñ sotsial-iqtisadi tormışı, bigräk tä millättäşlärebezneñ şaqtıy öleşe yäşägän awıldağı xällär turında kübräk häm tulıraq mäğlümät birergä tırışırbız. Bu eştä sez dä, x.t., qatnaşa alasız. Ägär dä sezneñ qızıqlı faktlar, waqiğalar xaqında mäğlümätläregez, täqdimnäregez bar ikän, alarnı bezgä 36-81-02 telefonı buyınça xäbär itärgä mömkin. Şulay itep, azatlıq radiosı tıñlawçılar belän xezmättäşlekne arttırırğa uylıy. Rimzil Wäliev isä Quray radiosı belän dä aralarnı yaqınaytu turında süz alıp bardı. Radionıñ citäkçese İrkä Musina belän ul Azatlıqta efirğa çığuçı qayber maxsus programmalarnı Quraydan yañğıratu xaqında söyläşte. Şuşı xezmättäşlekneñ däwamın bez kiläçäktä efirda işeterbez, dip ömetlänik.

Gölnaz İlgizär

XS
SM
MD
LG