Accessibility links

чәршәмбе, 7 декабрь 2016, Казан вакыты 11:57

«Tatmedia» agentlığında Tatnet turında tügäräk östäl söyläşüe uzdı




Xalıqara tuğan tel könenä äzerlek qısalarında 21 aprildä, Tatmedia agentlığında tügäräk östäl söyläşüe uzdırıldı. Ul tatar telen internet çeltärendä qullanu, tatarça saytlar buldıru mäs’älälärenä bağışlandı.

Ğlobal çeltärneñ tatar öleşen üsterü öçen, iñ berençe çiratta, qullanuçılarnıñ üzläreneñ tatarça belüe kiräk. Tügäräk östäl söyläşüendä qatnaşqan belgeçlär şundıy näticägä kilde. Tatarstan räsmi saytı öçen cawaplı Azat Axtarievnıñ äytüenä qarağanda, Prezident idäräse respublikanıñ räsmi oyışmalarınnan ğlobal çeltärdä üz saytların buldırunı taläp itä. Şul isäptän, tatar telendä dä. Bu eş äle awırlıq belän bara, ämma baytların buldırğan ministrlıqlar da baytaq.

İnternet aşa Salawat konsertın tapşıru belän tanılğan şirkät wäkile Marat Säyfievnıñ äytüençä, sayt xucalarınıñ mömkinlekläre bulsa da, alar säxifäläreneñ tatar öleşen üstermi. Saytlar yasawçı şirkät wäkile Marat Xaybullov, keçe häm urta biznes wäkilläre tatarça saytlarnıñ bötenläy kiräklegen kürmi, dip belderde. Tügäräk östäldä qatnaşuçılar bilgeläp ütkänçä, tatar saytlarnıñ üseşenä texnik säbäplär tügel, ä qızıqlı häm ädäbi tatar telendäge eçtäşlekneñ bulmawı qomaçawlıy. Şuña kürä, tatarlar yäşägän töbäklärdä milli internet saytlar belän şöğellänüçe kompyuter belgeçlären bergä ciep, uqıtırğa täqdim yañğıratıldı. :Tatnet yoldızları» bäygese qısalarında ütkärelgän seminar da kötelgän näticälär birmägän. Tatar.ru saytı wäkile Azat Axtärievnıñ xäbär itüençä, ütkän yılnıñ cäyendä, on-line tärcemäçe, konvertor, ezläw maşinası östendä eş başlaw xaqındağı kileşülär ütälmägän.

Älege tügäräk östälneñ eşendä Qazan däwlät universitetı häm fännär akademiäse qarşında eşläwçe laboratoriä wäkile Rinat Ğilmullin da buldı. Häm ul kompyuterlarnı tatarlaştıruğa qağılışlı ber yañalıq iğlan itte.Rinat Ğilmullinıñ äytüençä, «Microsoft» şirkäte XP eş sistemalarına 40 telne kerterä täqdim itkän. Tatarstan yağı räsmi räweştä «Microsoft» şirkätenä möräcäğät itsä, yaña ğına çıqqan programmalarğa tatar telen kertergä mömkin bulaçaq, dip sanıy Rinat Ğilmullin.

Bikä Timerova.

XS
SM
MD
LG