Accessibility links

якшәмбе, 4 декабрь 2016, Казан вакыты 17:16

Ğiraqta yaña şartlawlar - bu yulı könyaqtağı Basra şähärendä


Ğiraqtağı köç qullanu mäşhäre çärşämbe könne ilneñ könyağındağı Basra şähären teträtte. Anda bomba quyılğan maşinalar belän iminlek saqlaw qorılmalarına yasalğan höcümnär näticäsendä 70-kä yaqın keşe hälak buldı, alar arasında unlap mäktäp uquçısı da bar dip xäbär itelä. 100-läp keşe isä törle däräcädä cäräxätlär alğan.

Basradağı şartlawlarnıñ bersenä şahid bulğan ber ğiraqlı üz kürgännären häm işetkännären bolay sürätli:

Audio

"Bez bar şähärne teträtkän köçle şartlaw tawışın işettek, tiz genä uramğa yögerep çığıp andağı xalıqqa, yaralar alğan keşelärgä yardäm itärgä tırıştıq, anda bar cirdä dä keşe gäwdäläre awnap yata ide" di Basra şartlawın kürgän ğiraqlı. Basra britan ğäskärläre qaramağındağı ğäskäri zonağa kerä, alarnıñ andağı xärbi wäkile Jonathan Arnold, şartlawlarnıñ kimendä öçese intihar höcümçelär tarafınnan başqarıldı dip belderde. Anda yaralanuçılarğa yardäm itärgä aşıqqan britan ğäskärilären cıyılğan xalıq taşlar atıp qarşı alğan. Basranıñ xakime Wael Ğäbdelxafiz xäbärçelärgä, hälak buluçılarnıñ zur öleşen Ğiraq politsiäse xezmätkärläre häm ğadi xalıq täşkil itä, alar arasında şartlaw waqıtında şul tirädä minibusqa utırıp mäktäpkä barğan yäşüsmer uquçılar da bar dip belderde. Ğiraqnıñ yaña eçke eşlär ministrı Samir Sumaidy Basra şartlawların terror ğämälläre dip bäyäläp xökem itte.

Audio, Samir Sumaidy

"Bügen yaña ber cinayät, yaña wäxşät qılındı, terrorçılar berğäyepsez keşelärneñ, ğäyepsez balalarnıñ yaña ber törkemen yuq itte" dip bäyäli Basra şartlawların ilneñ eçke eşlär ministrı. Anıñ fikerençä, Basrada da, mart başında Bagdad häm Kärbala şähärlärendä şartlawlar oyıştırğan törkem eş itkängä oşap tora. Alar 181 keşeneñ ülemenä kitergän ide. Quşma Ştatlar wäkilläre, Kärbala häm Bagdadtağı terror öçen çığışı belän iordanlı bulğan Abu Musab äl-Zärqawi cawaplı dip beldergän ide. Britan premyer-ministrı Tony Blair, Basradağı şartlawlarnı xökem itep, Ğiraqtağı ğısyançılar xäzer ömetsezlektän ni eşlärgä belmi häm şuña kürä alar üzlären saqlıy almağan ğadi xalıqqa qarşı köräş alıp bara dip belderde. Tışqı eşlär ministrı Jack Strow isä, mondıy şartlawlarnı oyıştıruçılar üzläreneñ möselman qärdäşläre ğömeren sanğa da suqmawın kürsätä dide.

Audio, Jack Strow

"Xakimiatne Ğiraq xalqına tapşırunı özärgä tırışqan ğısyançılar bar, küplär, monıñ nindi maqsatı bar soñ dip sorar. Cawap şunda ki, andıy maqsat bötenläy yuq, bolar barısı da barı tik çualışlar häm cimerülär öçen genä oyıştırıla" di Britaniäneñ tışqı eşlär ministrı. Ul arada Ğiraqtağı amerikan xärbi wäkilläre, 35-läp ğısyançınıñ bügen Fälluca şähärendä andağı amerikan marinnarına ut açuı xaqında xäbär itte. Bäreleşlär anda yaqınça dürt säğät barğan, 9 ğısyançı üterelgän, amerikannar yağınnan 3 ğäskäri yaralanğan.

Kärim Kamal, Praga
XS
SM
MD
LG