Accessibility links

сишәмбе, 6 декабрь 2016, Казан вакыты 15:07

...ämmä Lenin bezneñ mayağıbız tügel inde


Ğädättägeçä aprel' azağı yaqınlaşqanda may ayı başındağı bäyräm häm yal könnäre tärtibe iğlan itelde. 1 may häm ciñü bäyrämnäre yal könnärenä turı kilü säbäple qanun buyınça yal könnäre eş könnärenä küçerelä. Şuña kürä Tatarstan xalqı bıyıl may başında 7 kön- 1,2,3,4 häm 8,9,10 könnärne yal itäçäk. May bäyrämnäre ütkärü öçen cawaplı qayber oyışmalar inde niätlären dä belderdelär. Tatarstannıñ Xönärilär berlege 1май- Yaz häm xezmät bäyräme könne-“2004 yılda xezmät xaqı burıçların beterergä” digän şiğar astında miting ütkärergä cıyınalar. Kommunistlar äle niätlären beldermädelär. Alar äle Ul'yanov- Lenin tuğan könen bilgeläp ütü çaraları belän mäşgul'. Mäğlüm ki Qazan- Leninnıñ revolyutsion yäşlege şähäre dip yörtelä ide. Tatarstanda Lenin muzeyları häm häykälläre işle. Pänceşämbe könne şundıy cirlärgä çäçäklär kiterü mitinglar ütkärü kebek çaralar ütkärelde. Mondıy çaralar kemgä kiräktä, alarğa kemnär yöri soñ? Moña saylawlar konkret cawap birä birüen. Şulayda 22 aprel' könne Rusiä mäğlümat çaraları cämäğätçelek fikeren soraşu näticäläre äle xalıqnıñ öçtän ike öleşe Leninnı häm anıñ xezmätlären tanıy häm uñay bäyäli dip belderdelär. Qazanda da isäp-xisap alıp baruçılar häm soraşuçılar bar. Lenin sörgenlektä bulğan Lenino-Kokuşkino muzeena xäzer yılğa 5 meñ çaması keşe kilä ikän. Elek sovet çorında biregä turist avtobusları kön sayın qır qazları kebek tezeleşep yöri ide. Ayına çama belän distä meñ çaması keşe kilä torğan bulğan. Qazanda 7-11 yäşlek mäktäp balaları arasında tanılğan psixolog Ramil' Ğarifullin ütkärgän soraşular alarnıñ biştän bere genä Leninnı yarlılarğa baylıq öläşüçe keşe dip belgännären kürsätte. Ber tıçqan äytkän di-“Üzemne yaratmasalar da tizägemne aşıylar äle” dip. Şulay xäzerge zaman balalarına Lenin kiräkmäsä dä annan miras bulıp qalğan şähär çistartu ömälärenä berençelärdän bulıp mäktäp balaların çığardılar. Monnan ber atna çaması elek Qazanda mäktäp balalarına yul qırıylarındağı qar astınnan çıqqan çüp- çarnı, törle xäşärätlärne cıydırta başladılar inde. Şähärdä 2 aylıq çüp cıyu ömäse iğlan itelde.

Şähär Şurası yullarnı häm transportnı yaxşırtu çaraları kürä.

Räsmi çaralarğa küzätüne däwam itäbez xörmätle tıñlawçılar. 22 könne Qazan milli mädäni üzägendä Xalıq deputatlarınıñ Qazan Şurasınıñ 19 sessiäseneñ öçençe utırışı uzdı. Utırış eşlekle şartlarda bardı. İñ berençe deputatlar transport belän tä'min itü mäs’äläse qaraldı, 4 yıllıq programma qabul itelde. İñ berençe urınğa yullarnı tözätü, asfal't cäye probleması quyıla. Metro tözüne tizlätü qaralğan. Utırış barğan könne Qazan metrosınıñ Ämi tawına taba 4 liniäsen qazıy başladılar. Utırışta “Qazannıñ 2015 yılğa xätle strategik üseşe turındağı” qararı ütäleşe ber tawıştan raslandı. Şunısı qızıq şähär başlığı Kamil' İsxaqov strategik üseş programmasın “bik qimmätle bala” dip atadı häm deputatlarğa aña saq belän möğämälädä bulırğa çaqırdı.

Yunıs Ätnäle.

XS
SM
MD
LG