Accessibility links

дүшәмбе, 5 декабрь 2016, Казан вакыты 13:45

Islam illäre konferensiäse Şaronnıñ yaña planın häm amerikannarnıñ anı yaqlawın kisken tänqit itä


Pänceşämbe könne Malayziä başqalası Kuala Lumpurda dönyadağı iñ zur säyäsi berläşmälärneñ berse, 57 möselman däwläte kergän "İslam illäre konferensiäse" oçraşuı ütte. Andağı fiker alışular üzägendä bu yulı Yaqın Könçığıştağı täräqqiat häm Ğiraqtağı soñğı qan qoyulı çualışlar mäs''äläse tora.

Möselman illäre citäkçeläre İzrailneñ, Gaza sızığındağı yähüd utarlarınnan waz kiçep, berük waqıtta Könbatış Yarda alarnıñ qayberlären qaldıru planın kisken räweştä kire qağıp, Şaronnıñ şuşı planın yaqlawı öçen Quşma Ştatlarnı da tänqitli. Barlığı 57 ildän torğan "İslam illäre konferensiä"se İzrailneñ şuşı niäten, "xalıqara xoquqi wäzğiatne bozu" dip bäyäläde. Oçraşu azağında qabul itelgän urtaq belderüdä, Washingtonnıñ Ariel Şaron planın xuplawı töbäktäge solıx eşlärenä zur zian kiterä, çönki ul plan fälästin xalqın anıñ tabiği xoquqlarınnan mäxrüm itä dielä. "İslam illäre konferensiäse" üzeneñ çirattağı utırışın maynıñ 4-endä ütkärergä tieş ide, läkin möselman dönyasında İzrailneñ soñğı plannarına häm amerikannarnıñ anı yaqlawına qarata tiskäre möğämälä artu säbäple oçraşunı irtäräk cıyu turında kileşende. Terrorğa qarşı köräştä Quşma Ştatlar belän tığız xezmättäşlek itkän möselman illäre dä Washingtonnıñ İzrail planın yaqlawın xökem itä. Malayziä premyer- ministrı Ğabdulla Äxmät Bädäwi misal öçen, prezident Bushnıñ Şaron niätlären xuplawı, Washingtonnıñ Yaqın Könçığış eşlärendä ber tarafnı da almağan yaq buludan çitläşä başlawın kürsätä dip belderde. Äle Kuala Lumpurdağı cıyınğa qädär ük, näq şul uq säbäp arqasında, yäğni Bushnıñ İzrail planın yaqlawına qarşı bulunı belderü yözennän İordaniä patşası Ğabdulla üzeneñ Quşma Ştatlarğa planlaştırğan räsmi säfärennän waz kiçkän ide. Mısır prezidentı Möbäräk, Quşma Ştatlarnıñ şuşı soñğı ğämäle ğäräp dönyasında Amerikağa qarata näfrätne älegä qädär kürelmägän yuğarılıqqa kütärde dip belderde. Malayziä premyer-ministrı bügen üzeneñ çığışında şulay uq Bush xakimiaten, Ğiraqta Berläşkän Millätlär eşen kiñräk cäyelderü mömkinlegen birügä öndäde.

Audio, Ğabdulla Äxmät Bädäwi

"İldäge soñğı täräqqiatne iskä alıp şunı äytergä kiräk, xalıqara cämäğätçelekkä Ğiraq eşlärendäge töp eşne Berläşkän Millätlärgä tapşıru öçen waqıt citte" di Malayziä premyerı. Anıñ fikerençä, şuşı täqdim belän Könbatış berektäşlegen äydäp baruçısı bularaq Quşma Ştatlar üzläre çığarğa tieş. Möselman illäre üzläre dä moña küpmeder öleş kertä aluına işarä itä. Alarnıñ kübese Ğiraqta amerikannarğa quşılunı kire qaqsa da, qayberläre, misal öçen, Pakstan, Malayziä, İndoneziä, xalıqara köçlär belän citäkçelek itü Berläşkän Millätlärgä tapşırılsa anda üz ğäskärilären cibärä aluı xaqında belderä.

Kärim Kamal, Praga
XS
SM
MD
LG