23 aprel’ – Xalıqara Kitap häm avtorlar xoquqların yaqlaw köne. Älege data Qazanda niçek bilgelänep ütte soñ? Comğa könne şuşı uñaydan respublikanıñ Milli kitapxanäsendä Yıl kitabın açıqlaw çarası uzdı. Bäygedä 2002 yılda respublika näşriätlärendä dönya kürgän 130 kitap qatnaştı. Şulardan yazuçı Rafail Mostafin citäkçelegendäge jyuri iñ-iñnären saylap aldı. Şulay itep, tatar telendä basılğan kitaplar arasında berençe urınnı Tufan Miñnullinnıñ Saylanma äsärläre aldı. İñ yaxşı şiğerlär kitabı bulıp İldar Yuzeev häm Şäwkät Ğäliev kitapları tabıldı. Balalar kitabı nominatsiäsendä Robert Miñnullin Balalar yılmayu basması ciñde. Rus telendä bastırılğan kitaplar arasında Mösäğit Xäbibullin, Dias Wäliev häm Äxät Muşinskiy äsärläre bilgeläp ütelde. Qazan milli mädäniät üzägendä isä Başqortstannıñ Qarğalı awılına bağışlanğan kitapnı täqdirläw buldı. Älege çaranı Tatar kongressı oyıştırdı.
Şuşı uq könne tağın ber soñğı aralardağı bik aktual’ sorawğa cawap tabıldı. Nihayät, respublikanıñ iñ däräcäle büläkläreneñ berse – Ğabdulla Tuqay isemendäge premiä lawreatları bilgele buldı. Bu zur häm däräcäle premiägä layıqlı dip 2002 yılda dönya kürgän Al’batros yazmışı cıyıntığı öçen bilgele yazuçı Mirğazıyan Yunıs tanıldı. Şuşı xäbärne işetkäç, bez yazuçı belän elemtägä kerep qaradıq, läkin, qızğanıçqa qarşı, Bawlı rayonınıñ Berezovskiy şifaxanäsendä sälämätlegen tazartıp yatuçı Mirğazıyan äfändeneñ üzen işetä almadıq. Anıñ fikerlären Tatarstan prezidentı Mintimer Şäymievneñ büläkläw turında räsmi qararı çığıp, Mirğazıyan Yunıs Qazanğa premiäne alırğa kilgäç belä alırbız. Ğabdulla Tuqay premiäsen tapşıru tantanası 26 aprel’ könne Şiğriät bäyrämendä ütärgä tieş.
Qazanda 20 aprel’dän başlap Rusiäneñ 9,10,11 klass uquçılarınıñ tarix buyınça olimpiadası bardı. İsegezgä töşerep ütik, bıyıl ul Qazannıñ meñyıllığına bağışlanğan ide. Comğa könne bik tantanalı räweştä, başqalanıñ iñ matur zallarınıñ berse bulğan Salix Säydäşev isemendäge Zur konsertlar zalında anıñ yabıluı uzdı. Anda Rusiäneñ 63 töbägennän kilgän tarix belän tiränten qızıqsınuçı 182 balalardan ciñüçelär iğlan itelde. Qızğanıçqa qarşı, alar arasında tatar balaları yuq. Älege olimpiadada belemnären kürsätkän Tatarstan uquçıları da berençelekne yawlıy almadılar. Barı tik Çallı gimnaziäse uquçıları ğına ikençe häm öçençe urınnarda kürenä. Xäyer, böten Rusiä uquçıları arasında ütkän bu bäygedä ikençe, öçençe urınnar da bik däräcäle sanala, älbättä.
Gölnaz İlgizär
