Accessibility links

шимбә, 10 декабрь 2016, Казан вакыты 00:17

Tatnet: Cämilä cırğa süzlär ezli


Tuqaynıñ tuğan köne yaqınlaşuı belän, tuğan telne saqlaw mäs’äläse xaqında söyläşülär yışraq işetelä başladı. Şul isäptän, tatar telen zamança texnologiälärdä qullanu mäsäläse dä kütärä. Bu atnada mäsälän «Tatmedia» agentlığında tatar internetı ölkäsendä eşläwçe keşelär qatnaşlığında tügäräk östäl söyläşüe ütte. Bez bu xaqta, köndälek xäbärlärdä söylägän idek inde. Bügenge «Tatnet» tapşıruında anda kütärelgän temalarğa täfsilläbräk tuqtalırbız. Ğlobal çeltärdä Tatarstannıñ küpçelek räsmi oyışmaları üz säxifälären buldırğan inde. Moña «Elektron Tatarstan» kebek proyektnıñ eşläp kilüe yärdäm itkänder.

Ämma bu säxifälärneñ tatarça bülekläre yuq. Räsmi oyışmalar monı texnik beleme bulğan häm tatarça belgän kadrlarnıñ citmäwe belän añlata. Tatarstannıñ tışqı elemtälär departamentı xezmätkäre häm räsmi tatar.ru saytı idäräçese Azat Axtariev, älege tügäräk östäldä tağın ber mä’säläne kütärde. Anıñ äytüenä qarağanda, kadrlar citmäw ber xäyer, äle räsmi oyışmalarğa räsmi säxifälären latinça yasarğa yaramıy ikän. Ämma belüebezçä, Rusiä qanunnarı da, Tatarstannıqıları da global çeltärdä latinça yazunı tıymıy. Xätta, Tatarstannıñ informatizatsiä turındağı qanunında, ike däwlät telendä mäğlümatlarnı urnaştıru tieşlege qaralğan.

Ütkän atnada Tatnet tapşıruında kütärelgän tema – tatar domenın buldıru mäs’äläse dä älege tügäräk östäldä telgä alındı. Tatar.ru wäkile Azat Axtariev andıy tırışlıqlarnı xäterli, ämma anıñ uylawınça, TAT domenın aludan mäğnä yuq, çönki anı totu öçen saytlar sanı citärlek tügel. Ämma başqa törle uylawçılar da bar. Alar TAT domenına oxşağan başqa illärneñ xäref tezmälären qullana. Mäsälän, AT.TT yäki TK.



«Azatlıq» radiosınıñ internet säxifäsendä ber yañalıq päydä buldı. Bügennän başlap, Azatlıq radiosınıñ köndälek xäbärlärenä yazılırğa mömkin. Ägär bu sezne qızıqsındıra ikän, räxim itep bezneñ säxifägä keregez häm anda, maxsus täräzädä, üz e-mailnı qaldırığız. Yazılğan oçraqta xalıqara küzätülär, Tatarstan häm Başqortstan, tatar dönyası xäbärläre sezgä kön sayın xat bulıp kilep toraçaq. «Azatlıq» radiosınıñ internettağı adresı üzgärmäde: www.azatlıq.org.



26 aprildän başlap 30na qädär, Berlinda Tatar mädäniäte atnalığı ütäçäk. Almaniä tatarları saytı idäräçese İldar Xarissov «Tatar gäzite»neñ konferensiäsendä bu xaqta belderü qaldırğan. Ul, atnalıqnıñ programması yazılğan internet säxifälärenä kerep çığarğa çaqıra. Ul barlıq forumçılarğa möräcäğät itep, Almaniädä yäşägän tanışlarğa xäbär itüne sorıy. Tatar mädäniäte atnalığı qısalarında Qazan räsemnäre kürgäzmäse, İldar Yuziev şiğerlären uqu, tatarlar turında söyläşü kebek çaralar kertelgän. tatar-mädäniäte atnalığı Berlinda, Törki institutta ütkäreläçäk. Säxifäneñ adresı: http://www.geocities.com/kharissov.



«Tatnet yoldızları» bäygesendä qatnaşırğa teläk beldergän perm-barda.narod.ru saytı soñğı yılda şaqtıy keşeneñ iğtibarın cälep ite. Saytnıñ forum bülegenä qarap şundıy näticägä kilergä mömkin. Biredä qatnaşuçılar da küp, kön dä yaña yazular barlıqqa kilep tora. perm-barda.narod.ru forumına Finländiädäge millättäşebez Cämilä dä kergäli ikän. Bu atnada ul ber tema başlap cibärep, täqdim kertkän. Cämilä, forumçılarğa, yaña cırlar öçen şiğer yazıp cibärüne sorağan.



Şunda uq elengän ber iğlan iğtibarnı cälep itä. Bıltır häm Kerpe isemle idäräçelär, çirattağı tapqır tatar internetçıların berläşterü omtılışın yasıy. Moña qädär alar real` tormışta, yäğni Qazanda, Çäy yortında oçraşırğa täqdim itä ide. Bu yulı Bıltır belän Kerpe virtualda küreşergä täqdim itä. Şulay itep, ägär sez tatar internetınıñ üseşenä bitaraf bulmasağız25 aprel’dä Qazan waqıtı belän köndezge säğät 12.00dä perm-barda.narod.ru saytınıñ çat bülmäsenä – räxim itegez.

Bikä Timerova.

XS
SM
MD
LG