Accessibility links

сишәмбе, 6 декабрь 2016, Казан вакыты 17:11

Tönyaq Koreä üzendäge şartlaw turında mäğlümat birmäsä dä, yardäm itüne ütenä


Bügenge küzätülärne Tönyaq Koreädäge zur timer yul qazası, anda bulğan şartlaw turında söyläwdän başlıybız, xörmätle tıñlawçılar. Şuşı kommunistik ilneñ inde yartı ğasırdan artıq dönyadan yabılıp yäşäwe säbäple, andağı faciğä turında mäğlümat bik yuq. Xalıqara yardäm oyışmaları, Tönyaq Koreä räsmilärenä tayanıp, 50-dän artıq keşeneñ hälak buluı, 1200-dän artığınıñ cäräxätlär aluı xaqında belderä. İldäge Könbatış diplomatları bu sannarnıñ tağın da yuğarı buluı turında xäbär itä.

Şvetsiäneñ Pxenyandağı ilçese CNN telekanalına, şuşı faciğädä kimendä 100 keşe hälak bulğan, ülüçelär sanı tağın da arta ala, çönki şartlaw tirä-yündä zur cimerülärgä kitergän häm xäräbälär astınnan yaña qorbannar tabıla ikän dip belderde. Tönyaq Koreäneñ tışqı eşlär ministrlığı bügen Pxenyandağı ilçelärne cıyıp, alarğa qaza turında qısqaça ğına mäğlümat birgän häm şunda uq xalıqara yardäm kiräklegen dä beldergän. Bu Tönyaq Koreädän kilgän berençe azmı-küpme bäysez xäbär bulıp tora, älegä qädär Xalıqara Qızıl Xac/Qızıl Ay cämğiate, üzeneñ Pxenyandağı xezmätkärläre aşa räsmi xakimiatneñ 54 ülüçe häm 1249 keşeneñ yaralanuı turında belderüen açıqlağan ide. Cämğiatneñ matbuğat wäkile John Sparrow:

Audio, John Sparrow

"Hälak buluçılarnıñ räsmi sanı 54, bu waqıtlı ber san. Cäräxätlänüçelär 1249, ämma bu da üsär tösle, çönki bezgä äle tağın 1850 yortnıñ tulısınça häm 6350-seneñ öleşçä cimerelüe xaqında da äyttelär" di Qızıl Xac cämğiate wäkile. Şuşı oyışmanıñ Tönyaq Koreädäge wäkilläre bügen faciğä urınında, ilneñ Qıtay çigennän 20 çaqrım yıraqlıqta yatqan Rençxon şähärendä bulğan. Alardan häm Pxenyandağı diplomatik çığanaqlardan alınğan mäğlümatqa qarağanda, şartlaw, xakimiat äytüençä, suğaru häm cir astı eşlärendä qullanıla torğan şartlatqıç töyälgän ber poyezdnıñ ikençesenä bärelüe näticäsendä bulğan. Anısı benzin häm neft sıyıqçaları alıp barğan. Şuşı bäreleş 100 meñ keşe yäşägän şähärneñ töp vokzalında buluı säbäple anıñ binası häm tirädäge yortlar tulısınça yuq itelgän. Xalıqara Qızıl Xac/Qızıl Ay cämğiateneñ Pxenyandağı wäkile Mäsğüt Xäydär soñraq, Tönyaq Koreä räsmiläre bäreleş bulunı kire qaqtı, poyezdlar çittäge yulğa küçerelgändä elektr bağanasına bärelgän dip kenä añlattı dide. İğtibarnı tağın şul da cälep itä - Rençxondağı şartlaw, Tönyaqnıñ kommunistik citäkçese Kim Çen İr timer yul belän Qıtaydan qaytqanda şuşı şähärne uzıp kitkännän soñ 9 säğät ütü belän bula. Könyaq Koreäneñ berläşü ministrı alayda, "bu maxsus oyıştırılğanğa oxşamıy, monı raslawçı dälillär yuq, qaywaqıt oçraqlı ğına närsälär dä kötmägändä zur faciğägä kiterä" dip belderä:

Audio, Jeong Se Hyun

Könyaqnıñ küzläw xezmätläre mäğlümatına qarağanda, qazağa, Kim Çen İr poyezdı ütü arqasında kilep tuğan butalçılıq säbäp bulğan. Tönyaq yağı şartlaw turında mäğlümatnı bötenläy birmi diärlek. Xalıqara Qızıl Xac cämğiate wäkillärenä qaza urınına barunı da ul bügen genä röxsät itte. Xäzer inde kommunistik Pxenyan faciğä uñayınnan üzenä yardäm itüne ütenä. Andıy möräcäğät belän ul Qıtayğa, Berläşkän Millätlärneñ Azıq-tölek fondına, başqa xalıqara oyışmalarğa çıqqan.

Kärim Kamal, Praga
XS
SM
MD
LG