Accessibility links

Кайнар хәбәр

Kipr grekları utrawnı berläşterü planın kire qaqtı – 1 Mayda Yevropa Berlegenä utraw bülengän kileş kerä


Şimbä könne ütkän referendumda Kiprdağı greklar utrawnı berläşterü planına qarşı çıqqannan soñ, bu plannı täqdim itkän Berläşkän Millätlär, Kiprdağı wäkilçelegen yabu turında belderde. Plannı tözüdä qatnaşqan BMO wäkile Alvaro de Soto bolay dide:

Audio (Alvaro de Soto)

"Kipr mäsäläsen çişü öçen iskitmäle tarixi mömkinlek ıçqındırıldı. General-sekretar Kofi Annan moña äle üz fikeren äyter. Ämmä Kipr Yevropa Berlegenä kergändä bülengän häm qorallanğan kileş qala. Berläşü östenlekläre tormışqa aşmıy."

Şulay itep, 1 Maydan başlap Yevropa Berlegeneñ qanunnarı häm östenleklär utrawnıñ xalıqara-tanılğan grek öleşenä genä qarıyaçaq. Berlekneñ kiñäyü komissarı Günter Verhoygen, Kipr mäsäläseneñ Berlekkä iärep kilüenä ükeneç belderde. Ämmä Kipr grekları prezidentı Tassos Papadopulos, referendum näticälärenä qaramastan, utrawda solıx protsessı däwam iter digän ömet bedlerde:

Audio (Tassos Papadopulos)

"Referendum näticäläre bülenşkä tügel, ä berläşügä etärgeç bulırğa tieş. Bez Kipr grekları da, töreklär dä, Yevropa ğailäsendä ber il, ber xalıq, Kipr xalqı bulırğa tieş."

Törkiä Tışqı eşlär ministrı Abdulla Gül, Kipr törekläreneñ berläşüne xuplap tawış birüe alarnıñ säyäsi häm iqtisadi izolatsiäsenä noqta quyarğa tieş, dide.

Kiprnıñ İntercollege professorı Hubert Foustmann fikerençä, nigezdä greklarnıñ kübese berläşergä teli, ämmä BMOnıñ xäzerge planı belän riza tügel. Alar üzlärenä faydalıraq şartlar teli. Andıy şartlar, misal öçen, Yevropa Berlegenä Törkiä kergändä täqdim itelergä mömkin.

Kipr mäsäläsendä ikençe belgeç, James Ker-Linsey başqa qaraşta. Anıñ fikerençä, referendum näticäläre utrawdağı büleneşne tağı da köçäytte, xäzer, yaqın arada berläşüne kötep bulmıy. Äzerbaycan kebek illär Kiprnıñ törek öleşen tanığan xäldä dä, Yevropa Berlege moña bara almıy, di ul. Alay da, Yevropa Berlege Kipr törekläreneñ "äye" dip tawış birüenä xuplaw belderde, häm utrawnıñ bu, xäyerçeräk öleşen üsterü öçen çaralar kürergä cıyına.

Ali Gilmi, Praga
XS
SM
MD
LG