Ütkän atnada Başqortstannıñ Neftekama şähärendä bulıp uzğan «Duslıq moñı 2004» dip atalğan xalıqara tatar-başqort cırların başqaruçılar festivalendä Udmurtiä başqalası İjawdan 16 yäşlek cırçı Dilärä Ğadal'şina qatnaştı. Tatar cırların osta başqaruı öçen yäş cırçığa yuğarı bäyä birelgän. Ul başqarğan cırlarnıñ berse — cirle avtorlar icatı cimeşe — süzlären İbrahim Biektawlı, muzıkasın Räif Bahawetdinov yazğan.
Dilärä muzıkantlar ğailäsendä üsä — anıñ ätise Möxämätnur Ğadal'şin elek Rusiädä tanılğan cırçı Edita P'yexa gruppasında cırlağan, 80-nçe yıllarda Soçida xalıq—ara cır bäygesendä qatnaşıp, ikençe urınğa layıq bulğan ide. Änise dä Fäniä xanım Qazanda däwlät cır häm biü ansamble sostavında un yıllap cırlap yörde. Ğadal'şinnarnıñ olı qızları Liliä osta biüçe. Dilärä ätiseneñ köçle tawışın, änisennän moñ alğan. Kiçälärdä, törle tamaşalarda xalıq yäş qıznıñ başqaruın yaratıp qabul itä. Cırlar belän genä çiklänmi Dilärä, muzıka uyın qorallarında da osta uynıy. Neftekamada bulıp ütkän bäygedä, ğomumän şuşındıy bäygelärdä, berençe qatnaşam, — dip urtaqlaştı Başqortstannan qaytqaç yarışlardan soñ tuğan fikerläre, xisläre belän Dilärä. Süzne yäş cırçı Dilärä Ğadal'şinanıñ üzenä biräbez.
Audio
Dilärä Ğadal'şinanıñ änise Fäniä xanım da, Dilärä üze dä kiläçägen cır, säxnä belän bäyläyäçägenä niätlänä. Dilärä xäzer İjaw şähäreneñ muzıka uçilişçesında uquın däwam itä, Qazanda konservatoriädä belem alırğa teläge yuq tügel. Belgeçlär bu qızda ömet bar dip belderä. Ä xäzer Dilärä qadal'şina başqarğan cırlarnıñ bersen — başqort xalıq cırı «Gölcamal»nı, xörmätle tıñlawçılar, bergäläp tıñlıyq äle.
Audio
Udmurtiä başqalası İjaw şähärendä üsep kilüçe yäş cırçı — Dilärä Ğadal'şina belän Xämidä Ğäyfullina tanıştırdı.
