Accessibility links

дүшәмбе, 5 декабрь 2016, Казан вакыты 05:27

Qabat “Yağımlı yaz” kilde


Unike yıl elek G. Tuqay tuğan köne uñayınnan, tatar yäşlären bergä tuplaw öçen “Mäğrifät” gäcite, “Azatlıq” tatar yäşläre berlege oyıştırıp cibärgän älege çara xäzer äkrenläp Qazan xakimiäte qulına küçte. Bıyılğı oyıştıruçılar arasında da Bötendönya tatar kongressı Başqarma komitetı häm “İdel” yäşlär üzägennän tış barlıq oyışmalar şähär xakimiätenä qarıy. Ul Balalar häm yäşlär eşläre komitetı, “Tatarstan-yaña ğasır” ictimaği säyäsi xäräkäteneñ Qazan territorial' bülege, Qazan milli mädäniät üzäge häm Qazan şähäreneñ tellär häm mädäniätlären üsterü buyınça “Ömet” fondı.

Bıyılğı festival'dä dä başqa yıllardağı kebek küp kenä yuğarı uqu yortları studentları qatnaştı. Qazan däwlät pedagogiä universitetı, Qazan däwlät universitetı, Qazan däwlät mädäniät häm sänğät universitetı älege festival'dä inde şaqtıy çarlanğan bulsa, Arçanıñ pedagogiä kölliäte äle berniçä yıl ğına qatnaşıp kilep üzeneñ ostalığı belän bıyıl barlıq tamaşaçılarnı şaqqattırdı. Dimäk, respublika rayonnarındağı uqu yortları da şähär festivalenä äkren genä ütep kerä dip äytergä bula. Bu üzenä kürä ber yañalıq bulıp tora. Bu xaqta festival'neñ jyuri räise Rimma İbrahimova da bilgeläp uzdı:

Yıl sayın festival'dä qatnaşuçılar sanı arta. Qazannan ğına tügel, ä respublika rayonnarınnan da küp qatnaşalar. Şunıñ belän anıñ sıyfatı da yaxşıra. Tatarstannan çittäge yäşlärneñ qatnaşuı da bezne söyenderä.

Soñğı yıllarda Tatarstannan çittä yäşäwçe yäş millättäşlärebezneñ dä “Yağımlı yaz”da kübräk qatnaşa başlawın Rimma İbrahimova bilgeläp uzdı inde. Udmurt däwlät universitetınıñ “Güzäl” tatar xalıq biyu ansamble üzläreneñ çığışları, milli kiemnäre belän zaldağı bar tamaşaçını şaqqattırdı. Bilgele bulğança, festival'neñ ğala-konsertına iñ-iñnärne genä saylap qaldırıp bereşär genä çığış yasatalar. Xätta köçle alqışlar bulsa da, waqıt tar bulu säbäple çığış yasawçılarnıñ kire säxnägä çığuı qaralmağan. Ä İjawlılarnıñ programmağa ike iyülläre kertelgän ide. Alar tatarstanlılarnı artta qaldırıp biyu nominatsiäsendä berençelekne yauladılar. Ural däwlät pedagogiä universitetı studentı Miläwşä Gaynanova da, Samara däwlät universitetınnan Gölşat Zinnurova da udmurtiädäge duslarınnan qalışmadılar, yuğarı urınnarğa layıq buldılar. Ğomumän ğala-konsertta utızğa yaqın çığış yasaldı. Anda cır-biyudän tış näfis süz, törle kölkele tamaşalar da buldı. Şulay uq alıp baruçılarğa da baya birelde. Ä alar barlığı dürtäw ide. İjawdan, Arçadan häm ikese Qazannan.

Ciñüçelärgä kilgändä, ägär uzğan yıl gran-pri berkemgä dä birelmäsä, bıyıl anı “Gölcamal” tatar xalıq cırı öçen Aygöl Sağinbayvıa aldı. Küp kenä tamaşaçılarğa Aygöl Salawat konsertınnan tanış. Ul anı konsertta üz uquçısı itep tanıştırğan ide.

Festival'dä törle nominatsiälär buyınça berençe häm ikençe urın aluçılar şaqtıy buldı. Alarnıñ härbersenä çäçäklär häm büläklär birelde.

Landış Xarrasova

XS
SM
MD
LG