Accessibility links

дүшәмбе, 5 декабрь 2016, Казан вакыты 11:45

Tatar sıynıflarında uquçılar Tuqay könenä bağışlanğan şiğriät bäygesendä qatnaştılar


23nçe aprel' könne respublika mäktäpläreneñ tatar sıynıflarında uquçılar arasında Ğabdulla Tuqaynıñ tuğan könenä bağışlanğan sänğätle uqu buyınça bäyge bulıp uzdı.

Udmurtiä respublikasınıñ mäğärif häm milli säyäsät ministrlıqları tatar ictimaği üzäge belän bergä yıl sayın Ğabdulla Tuqaynıñ tuğan könen zurlap bilgeläp ütüne üzläreneñ eş planına kertte. Ğädät buyınça, yıl sayın respublika mäktäpläreneñ tatar sıynıflarında uquçı balalar şiğriät bäyrämenä cıyıla. Yıl sayın bäyrämne uzdıru ssenariena da üzgäreşlär kertelep tora. Ämma monda ber närsä üzgäreşsez qala — balalar Ğabdulla Tuqaynıñ häm başqa avtorlarnıñ Tuqayğa bağışlap yazılğan äsärlären sänğätle itep uquda yarışa. Bıyılğı bäygedä respublikanıñ tatarlar kümäk yäşägän berniçä rayon, şähärlärennän tuğan telen üzläşterüçe illedän artıq uquçı qatnaştı. Bu balalarnıñ sänğätle uquda yarışuı bulıp qına qalmadı, bäygene oyıştıruçılar — İjaw şähäreneñ tatar gimnaziäse uquçıları, uqıtuçıları anı tuğan tele bäyrämenä äwerelderde.

Kiçä Nacar Näcmineñ «Tatar tele» şiğere belän başlandı, annan soñ konkursqa kilgän balalar Ğabdulla Tuqay şiğerlären uqıdı, cırların başqardı. Başqa tatar avtorlarınıñ balalarğa, tuğan telgä, ilebezgä bağışlap yazılğan şiğerläre küp yañğıradı. Muzıkal' tänäfeslär dä oyıştırırğa onıtmağan alıp baruçı — gimnaziäneñ tatar tele uqıtuçısı Räsilä İskändär qızı Ğabdraxmanova. İjaw şähäreneñ pedagogika kölliätennän «Şayan yoldızlar» ansamble cirle avtor Raif Balagetdinov häm İbrahim Biektawlınıñ berniçä cırın başqardılar, şulay uq Raif äfändeneñ Ğabdulla Tuqay süzlärenä icat itkän «Älli bälli bäw» cırı da zaldağı balalar häm ölkännär küñelenä xuş kilde. Gimnaziäneñ cidençe sıynıf uquçıları küptän tügel teatr atnalığına äzerlägän spektakl'lären cıyılğan balalarğa täqdim itte. Gimnaziäneñ başqa uquçıları da küp kenä cırlar başqardı. Älege uqu yortınıñ sigezençe sıynıf uquçısı Alsu Yuzeqayıva başqarğan şiğerne sezneñ iğtibarğa da täqdim itäbez.

—audio—

Äytergä kiräk, bıyıl konkursqa kilüçelärneñ çığışları ber-bersen qabatlamadı. Votkinsk şähäreneñ 12nçe mäktäbe balaları - äle başlanğıç sıynıfta ğına bulsalar da Tuqaynıñ şiğerlären teatralläşterep başqardılar. İjaw şähäreneñ 116nçı balalar baqçasınnan kilgän nänilär äle keçkenä genä bulsalar da inde Tuqaynıñ şiğerlären yatlağannar, cırların da öyrängännär, alarnıñ çığışları zaldağı barlıq keşelärneñ küñelendä bik cılı tä'sir qaldırdı. Glazov, Mojğa, Votkinsk şähärlärennän, Yukamen, Balezino rayonnarınnan kilgän uquçılar milli kiemnäre belän ayırılıp tordı. Glazovtan kilgän qızlar üzläre dä milli kostyumnardan yörergä yaratuların belderde.

—audio—

Bäygeneñ ciñüçeläre dä küp — 1-3 sıynıf uquçıları arasında berençe urınnı Balezino rayonı Padera mäktäbeneñ ikençe sıynıf uquçısı Lenar Tyutin aldı, 4-6 sıynıf balaları arasında Mojgadan Bulat Sagidullin buldı, ölkännär arasında gimnaziä uquçısı İlfat Xabirovqa östenlek birelde. Alarnıñ qaysıberäwläreneñ «Azatlıq» radiosı xäbärçese sorawlarına cawapların da tıñlap ütik äle.

—audio—

Uqıtuçılar nindi fikerlär belän kitä şığer bäyrämennän. Yukamen rayonı Palağay awıl mäktäbennän Tahirä xanım Abaşeva, Mojgadan Nadiä xanım Walieva.

—audio—

Şiğriät bäygesenä näticä yasap, mäğärif ministrlığınnan tatar tele belgeçe Älfiä Ğaysina, bolay dide.

—audio—

İkençe könne tatar sıynıflarında uquçı illeläp bala häm ana tele uqıtuçıları Ğabdulla Tuqaynıñ tuğan töbäge — Arça rayonında häm Qazanda säyäxättä dä bulıp qayttılar.

Xämidä Ğäyfullina, «Azatlıq» radiosı, Udmurtiä

XS
SM
MD
LG