Sember qalasınıñ iñ zatlı zalında – Lenin memorial' üzägendä Zakir Şahban, Elvira Xäyrullina, Läysän Ğimayıva häm başqa yäş talantlar qatnaşlığında zur konsert buldı.
Alıp baruçı Röstäm Särwärev ayıruça cılı qabul itelde. Här yaña cırçı çığar aldınnan näq aña bağışlanğan şiğırlär täqdim itüe, xalıqqa konsert barışında tamaşaçı role belän genä çiklänmiçä – üzen qatnaşuçı itep xis itärgä mömkinleklär tudırırğa tırışuı – älbättä, bik tä kürkäm ğämällär. Monıñ öçen artist bulu ğına citeşmi, xalıq belän ber sulışta ikäneñne toyu da kiräk.
Läkin ölkän yäşleräk tamaşaçı fikerençä, iğlannarda “kölke professorı” dip atalğan Räşit Şamqayıvnıñ tupas, mäğnäsez censi “şayarışları” zur rizasızlıq tudırdı. Tämle bäyräm aşın ber qaşıq deget belän pıçratqanday buldı anıñ çığışları.
Şunısı da bar bit äle: “anekdot” süze üze ük “basılmağan” digänne añlata. Rusça äytsäk, “nepeçatnoye”, yäğni kitapqa basıp çığarırğa yaramağan, barı tik bädräflärdä ir-at üzara ğına söyli ala torğan “xikäyätlär”. Ä biredä ölkän yäştäge ağay säxnädän(!) yäş tamaşaçı aldında oyatsız süzlär söyli. Sovet çorındağı senzuranı da sağınırsıñ, eşlär bolay barsa.
Tuqay könnäre turında Mäläkäs şähärennän häm tatar awılları mäktäplärennän xäbärlär kilep töşte. Uqıtuçılar äytüençä, bıyıl alar kiñräk külämdä häm tiränräk eçtälekle uzğannar.
Ölkä üzägendä uzğan Tuqay bäyrämnäreneñ bıyılğı üzençälekläre dä şulay äytergä nigez birä.
28-mäktäptä – başlanğıç sıynıflar balalarınıñ kübräk cälep itelüe.
55-mäktäptä - Sengiley pedagogiä kölliäte talibäläreneñ praktikası şuşı waqıtqa turı kilüe. Näq alar tırışlığı arqasında 1 – 11 tatar sıynıfları balaları çığarğan stena gäzitläre konkursı uzdı. Tuqay äsärlärenä, anıñ tärcemäi xälenä qarata sorawlardan tözelgän viktorina Tuqayğa kem yaqınraq ikänen açıqladı.
Yaña şähärneñ 15 mäktäbendä törle formalarda ana telenä yaqınayuçı balalar 68-mäktäpneñ zur zalında üzara köç sınaştılar. Här mäktäptän saylap alınğan berär genä şiğır söyläwçe alınğan. Uquçılar üzläre öçen genä tügel – mäktäp isemen aqlar öçen dä sänğätle uquda yarıştılar. Şiğırlär cırlar belän çiratlaşıp bardı.
Kiçä İdelaryağı rayonı mäğärif bülege metodistı Zifa Sabitovanıñ ana tele buyınça törle olimpiadalarda ciñep çıqqan uquçılarğa diplom häm büläklär tapşıruı belän başlandı.
Xäyer, üz säläten kürsätkän balalarnıñ barısı da büläklärgä layıq buldı. Büläk itep tirän eçtälekle kitaplar öläştelär. Tarixi näfis äsärlär balalarda häm alarnıñ äti-änilärendä tarixıbızğa yaqınayuda etärgeç bulır, dip ömetlänälär bäyrämne oyıştıruçılar. Töp oyıştıruçısı, ğädättägeçä, “Tuğan tel” oyışmasınıñ särkätibe Zöhrä Xäbibullina buldı.
Çaradan soñ oyıştıruçılarnıñ üzara äñgämäsendä kiläse yılda şundıy uq ısul belän şähär külämendä bäyräm uzdırırğa qarar qıldılar. Bu – elek “Tuğan tel” uzdırğan, ämma soñğı yıllarda yuğalıp qalğan zur çaralarnı yañartu bulır ide, didelär. Ä sülpänlänüneñ säbäbe - barlıq bäyrämnär çaraların üz qulına alğan räsmi Tatar mädäni üzägeneñ Tuqay könenä, ana tele könenä iğtibar itmäwe näticäse.
Şul turıda citdi süz kitapxanädä aprel'neñ 25endä uzğan Tuqayğa bağışlanğan çarada da kütärelgän ide.
“Azatlıq” radiosı, Ayrat İbrahim, Sember.
