Accessibility links

шимбә, 10 декабрь 2016, Казан вакыты 17:55

Däwlät sekretare Powell: Ğiraq xökümätenä älegä çiklängän möstäqillek bireläçäk


Ğiraqta 1-nçe yülgä qädär qorılaçaq waqıtlı xakimiatneñ wäkalätläre çiklängän bulaçaq häm ul ildäge amerikan xärbiläreneñ ğısyançılarğa qarşı ğäskäri operatsiälärenä qomaçawlıy almayaçaq - Quşma Ştatlarnıñ däwlät sekretare Colin Powell şulay dip belderä. Washington berençe märtäbä, Ğiraqtağı yaña xökümätneñ tulı möstäqillekkä iä bulmayaçağına işarä itä.

Şuşı süzlären amerikan däwlät sekretare "Reuters" agentlığı xäbärçesenä äytte, xörmätle tıñlawçılar. Powell fikerençä, Ğiraqnıñ kiläçäk xökümäte, ildä amerikan ğäskärlärenä irekle eş itü mömkinlegen birep öleşçä üz wäkalätlärennän waz kiçärgä tieş bulaçaq, monı iminlek tä''min itü maqsatında eşläw zarur.

Audio, Colin Powell

"Bu möstäqillek, älbättä, di Powell Ğiraqtağı xakimiatne cäygä cirle idarägä tapşıru turında, läkin ğiraqlılar şul möstäqillekneñ ber öleşen, alar isemennän häm alar röxsäte belän eş itü öçen bezgä tapşıraçaq. Bu bezneñ alardan xakimiatne tartıp alu bulmayaçaq, barı tik alarnıñ bezdän yardäm kötüen häm bezneñ şul yardämne kürsätkändä irekle eş itä alubıznı añlaw ğına bulıp tora" di Quşma Ştatlarnıñ däwlät sekretare. Älegä qädär Ğiraq wäkilläre, amerikannar ildä üz ğäskärlären qaldırsa da, xakimiatne waqıtlı xökümätkä tulısınça tapşırır dip ömetlängän ide. Uzğan atnada Quşma Ştatlarnıñ däwlät departamentı räsmie, Powellnıñ urınbasarı Marc Grossman berençe märtäbä "çiklängän möstäqillek" digän töşençäne qullandı. Ul açıqtan-açıq, Ğiraqtağı xökümät andağı amerikan ğäskärlären häm alarnıñ xärbi operatsiälären kontrol'' itmiäçäk dip belderde. Ser tügel, Ğiraqtağı xakimiatne mömkin qädär tizräk cirle idarägä tapşırunı taläp itep Quşma Ştatlarğa basım xalıqara cämäğätçelek tarafınnan da, Ğiraqnıñ üzendä dä yasala. Powellnıñ soñğı belderüenä möğämälä Ğiraqnıñ eçendä älegä qädär tizkäre genä. Amerikannar bilgelägän waqıtlı idarä Şurası äğzası Nasıyr Çadırçı däwlät sekretare süzlären "mantiqqa sıymıy" torğan dip bäyäläde. Germaniäneñ DPA xäbär agentlığına ul, "Colin Powellnıñ, Quşma Ştatlarnıñ Ğiraqta, xakimiat küçerelgännän soñ da nindider wäkalätlärne üzendä saqlap qalırğa tırışuın kürsätkän fikerläre mantıyqqa turı kilmi" dip belderde. Çadırçı Ğiraqnıñ Milli demokratik partiäsen citäkli. Berük waqıtta Washington Ğiraqta totrıqlılıq buldıru eşenä Berläşkän Millätlärne kiñräk cälep itü tırışlıqların da kürä. Şul maqsatta ul İminlek Şurasında Ğiraqqa qarağan yaña qarar qabul itüne teli häm Powell monı yänä ber märtäbä qabatladı.

Audio, Colin Powell

"Ğiraqqa ğäskär cibärüçelär häm başqa törle yardäm itüçelär sanın arttıru öçen, möstäqillekne küçerü waqıtı yaqınlaşu belän Berläşkän Millätlärneñ yaña qararın qabul itü urınlı bulır ide" di amerikan däwlät sekretare. Küzätüçelär fikerençä, bu turıda Berläşkän Millätlärdä kötelgän bäxäs üzägendä näq menä, ğiraqlılarğa möstäqillekne tulısınça birergäme, ällä anı çiklärgäme digän mäs''älä toraçaq. Sişämbe kiçen Berläşkän Millätlärneñ Ğiraqtağı maxsus wäkile Laxdar Braximi İminlek Şurasına, üzeneñ Ğiraqta waqıtlı xökümät qoru plannarı turında xisap biräçäk.

Kärim Kamal, Praga
XS
SM
MD
LG