Accessibility links

якшәмбе, 4 декабрь 2016, Казан вакыты 17:27

Damask höcüme artında kem tora?


Älegä qädär çağıştırmaça tınıç bulğan Süriäfä sişämbedä şartlaw, atışular buldı. Başqala Damasknıñ diplomatlar yäşägän bistäsendä maşinağa quyılğan bomba şartladı, bilgesez törkem belän iminlek köçläre arasında bulğan atışular näticäsendä 4 keşe haläk bulğan. Bu höcüm öçen älegä berkem dä cawaplılıqnı üz östenä almadı.

Şahitlär äytüenä qarağanda, sişämbedä kiçke 7lärdä Damasknıñ ilçeleklär urnaşqan Mazza bistäsendä maşinağa quyılğan bomba şartlağan. Tiz arada kilep citkän iminlek köçläre belän bilgesez keşelär arasında atışular ber säğät çaması däwam itkän. Süriäneñ räsmi SANA agentlğı xäbär itüençä, näticädä dürt keşe haläk bulğan: ike höcümçe, ber politsiä xezmätkäre häm uramnan ütep baruçı xatın-qız. Höcümçelärneñ tağın ikese yaralanğan dielä. Şartlaw, qayçandır Berläşkän Millätlär oyışması qullanğan, xäzer buş torğan bina yanında bulğan. Binağa zıyan kilsä dä, anda keşe bulmağan, şuña kürä qorbannar yuq. Yänäşädä urnaşqan Kanada, İran ilçelekläre häm Britan ilçese utırmasında zıyan kürüçelär yuq.

Politsiä tirä yaqnı tentep çıqqannan soñ yaqındağı ber binada qoral saqlanması tapqan. Çärşämbedä Süriäneñ däwlät televideniese ber toraq bülmägä öyelgän granatometlar, gaz balunnarı, sarı tösle matdä tutırılğan qapçıqlar kürsätte, häm monı höcümçelärneñ qoral saqlamnası dip añlattı. Höcüm öçen cawaplılıqnı älegä berkem dä üz östenä almadı. Süriä räsmiläre älegä özderep berni äytmäde, mondıy xällär bu ildä siräk küreneş. Farazlar berniçä.

Şartlaw bulğan urındağı binada zamanında Berläşkän Millätlärneñ tınıçlıq saqlaw köçläre urnaşqan bulğan. Bu köçlär Golan qalqulığında Süriä belän İzrail ğäskärläre arasındağı kileşüneñ ütälüen küzätä. Şul säbäple, faraznıñ berse İzrail-Fälestin konfliktı belän bäyle.

Faraznıñ ikençese älege dä bayağı Äl-Qaidä belän bäyle. 11 sintäber xällärennän soñ könbatışnıñ berniçä ile bu çeltär belän bäyle dip şiklänelgän Süriä keşelären sorawlar alu öçen Damaskka tapşırdı. Qayber mäglümätlärgä qarağanda, xäzerge prezident Başar Äl-Assadnıñ ätise, Xafiz Äl-Assad tarafınnan 80-nçe yıllarda bastırılğan Süriädäge möselman-qärdäşläre oyışması xäzer Äl-Qaidä belän elemtädä tora.

Nixayät, küptän tügel, Süriäneñ körd azçılığı kürşe Ğiraqtağı millätäşlärenä iärep, üzlärenä kiñräk avtonomiä taläp itkän ide. Xoquq yaqlaw oyışmaları belderüençä, xökümät körd citäkçelären qulğa alular belän cawap birgän.

Östäp şunı äytergä bula, ber kön elek kenä kürşe Jordan räsmiläre Äl-Qaidäneñ ximik höcümen faş itüwen belderde. Elegräk Jordan politsiäse şartlatqıç tutırılğan ike yök maşinasın totqarlap, ala Süriädän kilgän digäç, ike il arasında qarşılıq tuğan ide. Alay da çärşämbedä Jordan ğına tügel, Misır, Livan häm başqa ğäräp citäkçeläre Başar Äl-Assadqa şaltıratıp teläktäşlek belderde.

Ali Gilmi, Praga
XS
SM
MD
LG