Accessibility links

дүшәмбе, 5 декабрь 2016, Казан вакыты 11:36

Tatarstannıñ Yıl uqıtuçısı - Çallıdan


Ğädättä uqıtuçılarnı, mäğärif xezmätkärlären yılğa berniçä märtäbä – Uqıtuçı könendä, uqu yılı başında häm anıñ axırında ğına iskä töşerep, zurlıylar, matur süzlär äytälär. Xäzer älege datalarğa tağın ber kön östälde kebek. Çınlap ta, bıyıl inde öçençe märtäbä uzdırıla torğan Yıl uqıtuçısı bäygeseneñ yabılu tantanasın anda qatnaşuçılarnı zurlap, bik matur häm qupşı itep oyıştırğannar ide. Tantananıñ Salix Säydäşev isemendäge Zur konsertlar zalında ütüe dä üze ni tora. Bäygedä qatnaşuçılarnı tulı zal ayaq ürä basıp, alqışlarğa kümep qarşı aldı. Ssenariy belän naçar tanış bulu säbäplederme, süzlären onıtqalap, butalıp kitüçe kiçäne alıp baruçılar da zur bäyräm atmosferasın boza almadılar. Tantanağa uqıtuçılarnı qotlarğa kilgän Ğäliäskär Kamal teatrı artistı Rawil Şäräfiev alarğa bik matur, cılı süzlär äytte häm, ğafu ütenep kenä bulsa da, tatarça berniçä şiğer dä uqıdı. Respublikanıñ Mäğärif ministrı Fariz Xarisov isä, üzeneñ çığışında älege bäygeneñ ähämiäte, Yıl uqıtuçısı konkursınıñ cämğiättä möğallim rolen üsterüe turında söyläde.

Ä xäzer bäygeneñ üzenä häm anda ciñü yawlawçılarğa qaytıyq äle. Berençe urınnı yawlap Tatarstannıñ Yıl uqıtuçısı bulıp Çallı gimnaziäseneñ başlanğıç klass uqıtuçısı Tatyana Molotkova saylandı. Aña iñ zur büläk – Oka avtomaşinası tapşırıldı. Tağın 4 uqıtuçı – Bögelmädän, Qazannan häm Yuğarı Oslan rayonınnan – prizlı urınnar yawladı. Alar 12 meñ sum aqçalata büläk aldılar. Finalda qatnaşqan tağın 10 uqıtuçı – bäygeneñ lawreatı isemenä layıq buldılar. Alarğa 6 meñ sum aqça birelde. Älbättä, ber qarağanda, bu aqçalar ällä ni zur tügel. Läkin ayına 1-2 meñ xezmät xaqı alıp eşläwçe uqıtuçılar öçen bu summalar da şaqtıy. Bez sezne uzğan tapşıruda tanıştırğan Piträçtän Larisa İvanova da lawreat isemenä layıq buldı. Lawreatlar isemen yawlawçılar arasında şulay uq Saba, Baltaç, Tübän Kama, Alabuğa, Mendeleevsk, Norlat, Qazan, Bawlıdan kilgän uqıtuçılar bar.

Tağın şunısın äytep kitäse kilä. Ciñüçelär arasında rus tele häm ädäbiäte, başlanğıç klass uqıtuçıları küpçelekne täşkil itä. Tatar tele möğallimäse, inde äytkänebezçä, ber genä. Bu oçraqlı ğına kilep çıqqan xälme? Bäygedä qatnaşuçılar belän bik küp aralaşıp, alarnıñ eşlärenä bäyä birgän tatar tele belgeçe Sirinä Trofimova süzlärenä qarağanda, älege wazğiät – oçraqlı xäl tügel. Nigäder, tatar tele uqıtuçıları başqalar belän çağıştırğanda üzlären tıynağraq totalar, başqalar kebek bulğan belemnären dä tulısınça keşelärgä kürsätä almıylar, dip zarlandı Sirinä xanım. Tatar xalqına xas bulğan sabırlıq, üz-üzeñne alğa çığarmaw kebek bäygelärdä qomaçawlıy torğan ğädätlärdän arınırğa kiräk bezneñ uqıtuçılarğa, di ul. Xäyer, uqıtuçılar öçen bäygelärdä ciñü iñ kiräkle närsä tügel bit. İñ möhime, uquçılardan çın keşene tärbiäläw, ana teleñä balalarda mäxäbbät uyatıp, alarnı üz tuğan telendä söyläşkän öçen ğafu ütenmäskä öyrätüder.

Gölnaz İlgizär

XS
SM
MD
LG