Accessibility links

шимбә, 10 декабрь 2016, Казан вакыты 11:49

Atışlarnı tuqtatu kileşüe ğämäldä bulsa da, Fälücada amerikan köçläre ğäskäri operatsiäsen däwam itä


Ğiraqnıñ Fälüca şähärendä amerikan xärbiläre andağı sönni ğısyançılarğa qarşı höcümnären däwam itä. Alınğan xäbärlärgä qarağanda, Quşma Ştatlarnıñ xärbi oçqıçları şähärneñ meñ yarımlap ğısyançı yäşerenep yatqan dip şiklänelgän bistälären çärşämbedä bombağa da totqan. Bäreleşlär anda tönlä dä tuqtalmağan.

Quşma Ştatlarnıñ qorallı köçläre Fälüca şähärenä öç atna elek, anda amerikannarğa qarşı fetnä çığıp, şul qalada eşlägän dürt amerikan iminlek xezmätkäre yawızlarça üterelgännän kertelgän ide. Washington alarnı ütergän häm mäyetlären yandırıp uram buylap österäp yörgän keşelärne üzenä tapşırunı taläp itä. İke atna elek Fälücada atışlarnı tuqtatıp toru turında kileşügä ireşelgän ide. Ul formal'' töstä äle dä köçtä, gärçä atnakiç tä amerikannar andağı ğısyançılarğa qarşı höcümnären däwam itte. Quşma Ştatlarnıñ Ğiraqtağı xärbi citäkçelärennän berse general Mark Kimmit bu xaqta bolay dip belderde.

Audio, Mark Kimmit

"Atışlarnı tuqtatu kileşüen ğämäldä qaldıru berektäşlek köçläreneñ niäte bulıp qala. Bügen sez Fälücada kürgän xällär barı tik saqlanu maqsatınnan çığıp yasalğan çaralar ğına, ägär dä bezgä atalar ikän, bez cawap qaytaraçaqbız. Atışlarnı tuqtatu kileşüe köçtä sanalsa da, bez anda tik kenä utırıp üzebezgä ut açuğa yul quymayaçaqbız, " di general Kimmit. Fälücada tögäl ni buluın belü qıyın, xäbärçelärgä şähärdä qalu qurqınıç bulu säbäple annan riasız mäğlümat alu qatlawlı kileş qala. Älegä kilgän xäbärlärgä qarağanda, amerikan xärbi oçqıçları andağı öç bistäne kiçä bombağa totqan, şul bistälärdä Quşma Ştatlar ğäskärilärenä daimi ut açıp torğan ğısyançılar qaçıp yata dip farazlana. Amerikan yağı, üz köçläreneñ barı tik şul qorallı fetnäçelärgä qarşı ğına köräşüen äytsä dä, Ğiraq politsiäsendä eşläwçe beräw bügen, AQŞ ğäskäriläre Fälüca yanındağı tikşerü nığıtması tiräsendä ber minibusqa ut açıp 4 keşene üterde dip belderde. Quşma Ştatlar prezidentı George Bush isä Fälücadağı wäzğiat yaxşıru yağına taba bara dip isäpli.

Audio, George Bush

"Fälücanıñ zur öleşe normal'' xälenä qaytıp bara, anda qayber urınnarda qarşılıq kürsätü saqlansa da, bezneñ xärbilärebez ğiraqlılar belän bergä şähärne imin itäçäk" di amerikan prezidentı. Ämma ul berük waqıtta, 30-nçı yün köne, yäğni Quşma Ştatlarnıñ Ğiraqtağı xakimiatne cirle idarägä tapşıru mizgele yaqınlaşqan sayın ildä çualışlar artaçaq digän fikerdä toruın da äytä.

Audio, George Bush

"Möstäqillekne tapşıru waqıtı yaqınlaşqan sayın, çittän kilgän suğışçılarnıñ, räncegän Baathçilarnıñ, Moqtada äl-Sadr duslarınıñ täräqqiatne tuqtatırğa tırışuları bik mömkin, xäzerge waqıtta näq menä şul küzätelä" dip añlata Ğiraqtağı soñğı bäreleşlärne amerikan prezidentı Bush. "New York Times" basması üzeneñ soñğı sanında, Quşma Ştatlarnıñ saqlanu ministrlığı xisabına tayanıp, soñğı çualışlarnı Saddamnıñ yäşeren xezmätlärendä eşlägän keşelär oyıştıra dip yaza. Atnakiçtä genä Ğiraqnıñ törle cirlärendä oyıştırılğan höcümnärdä kimendä 10 amerikan ğäskärie hälak buldı. Şularnıñ 8-e Bagdadtan könyaqta yatqan Mäxmüdiä şähärendä, maşinağa quyılğan bomba şartlawı näticäsendä üterelde. Şuşı april ayında ğına Quşma Ştatlar Ğiraqta 126 xärbien yuğalttı.

Kärim Kamal, Praga
XS
SM
MD
LG