Accessibility links

якшәмбе, 11 декабрь 2016, Казан вакыты 16:55

Millät üseşenä yaña qaraş


Bügen Böten dönya tatar kongressı binasında tatar milläteneñ üseşenä bağışlanğan fänni simpozium bulıp ütte. Töp doklad belän çığış yasağan, tarix fännäre doktorı Damir İsxaqov, 21nçe ğasırda milli üseş mäsällärenä yañaça qararğa kiräk, digän fiker äytte.



Tatarstannıñ üz bilgelänüe turındağı soñğı belderülärenä dä inde 13 yıldan artıq bulsa da, millät üseşe qaysı yünäleştä bulırğa tieş digän söyläşülär, äle dä bulsa däwam itä ide. Tatar kongressı qarşında eşläwçe etnologik monitoring üzäge citäkçese Damir İsxaqov fikerençä, millät üseşe kontsepsiäsenä, 21nçe ğasır kilep citüenä tözätmä yasap, yañaça qarar waqıt citte. Ul üzeneñ çığışında üzgärep barğan säyäsi häm ictimaği şartlarda tatar milläteneñ üseşe öçen kiräkle şartlar tä’min itü turında uylarğa çaqırdı.

Simpoziumda çığış yasağan başqa ğalimnär häm cämäğät eşlekleläre millät üseşe kontsepsiäseneñ törle-törle yaqlarında iğtibar birdelär. Mäsälän, federal tatar milli mädäni avtonomiä räise Tatar mäğlümat çaralarınıñ millätne tözü eşendäge role xaqında söyläde. Tarixçı İskändär İzmailov «millätneñ tarixta ütkän yulı turında belü -tatarnı berläşterügä häm saqlap qaluğa yärdäm itärgä mömkin» dip äytte. Şulay uq, millätne saqlap qalu eşendä dinneñ role xaqında fännär doktorı Rafik Möxämmätşin söyläde. Akademik Mirza Mäxmutov «milli universitetnı tözü» xaqında da çığış yasadı. Simpoziumda ğomumän tatar telendä yuğarı belem birü mäs’älälärenä zur iğtibar birelde. Mäsälän Qazan däwlät Arxitektura häm Tözeleş Akademiäseneñ dotsentı häm «Fän häm Tel» jurnalınıñ baş möxärrir urınbasarı Räşit Şakircanov tatar tele fänğä yaxşı turı kilä, dip äytte.

Simpoziumda ber çit qunağı da bar ide. Aleksandr Jermen isemle Kanada universitetı aspirantı tatarlarnıñ millät üseşe turında söyläşep, fiker alışuı belän bik qızıqsındı. Cirle xalıq turında mäğlümat tuplağaç, Rusiädäge tatarlarnıñ häm Kanadadağı fransuzlarnıñ xälen çağıştıra alam dide ul.



Älege simpozium eşendä milli mäğärif, tarix, mäğlümat çaraları mäs’äläläre belän şöğellänüçe ğalimnär qatnaştı. Töp çığışlar yasalğannan soñ, Kongress binasında fänni diskussiä, fiker alışular buldı.

Bikä Timerova.

XS
SM
MD
LG