Accessibility links

якшәмбе, 11 декабрь 2016, Казан вакыты 13:12

Germaniä kügendä hälak bulğannarnıñ tuğannarı Germaniägä xäsrätle säfärgä çığa


Bu atnada Başqortstan witse – premierı Boris Qolbin citäkçelegendäge räsmi wäkillek Germanída eş säfärendä buldı. Republíknıñ qayber ere şirkätläre citäkçeläre häm bilgele eşquarlar da kergän bu wäkillek Almanínıñ berniçä cirendä, şul isäptän Saksonída häm Baden Vyürtembergta bulıp küp oçraşularda qatnaştı. Älege säfär barışında üzara xezmättäşlek xaqında qayber kileşülär dä imzalanğan. Başqortstan wäkilllege Almanídan comğa könne äylänep qayttı.

2 may könne Almaníğa Başqortstannan tağın ber zur ğına wäkillek säfärgä kitä. Bu yulı xäsrätle säfär bula ul. İke yıl çaması elek Germaní kügendä Başqortstan oçqıçı faciğäsendä hälaq buluçılarnıñ tuğannarı, cämğese 60 tan artıq keşe Almaníğa barıp märxümnärne iskä alu çaralarında qatnaşaçaq. Ufada yäşäwçe Rozalí Yosıpowa ul qotoçqıç faciğädä üzeneñ Ruslan isemle ulın yuğaltqan ide. Bez Rozalí xanımnan äle Almaníğa säfärneñ maqsatları turında soraştıq.

(audio)

Älege säfärgä turı kiterepme, Germanída şuşı hälaqät näticälären tikşerüçe törkem wäkilläre 30 äprel könne Rusiä telewidenie qanallarına tikşerü eşläre barışı xaqında mäğlümatlar birde. Alarnıñ ışandıruına qarağanda, faciğäneñ ni säbäple kilep çığuı turındağı xisap doqladı 17- 23 may könnäre arasında iğlan iteläçäk. Brawnşweyg şähärendä alıp barıluçı tikşerü eşläreneñ bik ozaqqa suzıluına Rusiä häm Başqortstan yağınnan küp kenä däğwalar bulğan ide. Çönki Almaní tikşerüçeläre üzläreneñ xisabı tizdän bäyän iteläçäk dip wäğdä birep, bu eşne berniçä tapqır kiçekterä kilde. Bu yulı da tikşerü näticäläre may azağında äzer bulaçaq digän süzlärgä qorbannarnıñ yaqın tuğannarı bik ışanıp ta betmi inde xäzer.

XS
SM
MD
LG