Accessibility links

сишәмбе, 6 декабрь 2016, Казан вакыты 17:11

Tatarstan bäyrämnärgä äzerlänä


Tatarstan prezidentı Mintimer Şäymiev comğa könne respublikanıñ berniçä rayonı buyınça eşlekle säfärdä buldı. Aldan ul 20 meñnän artıq xalıq yäşägän Apas rayonına bardı. Monda ul yazğı qır eşläreneñ barışı belän tanıştı, awıl xucalığı citäkçeläre belän oçraştı, qayber kümäk xucalıqlarnı qarap çıqtı. Şulay uq ul Apasnıñ söt kombinatında da buldı. Rayon häm anıñ üzäge belän tanışqannan soñ, prezident rayonnıñ kürşesendä urnaşqan Bua häm Çüpräledä buldı. Bu rayonnarda da Şäymievneñ säfäre ğädättägeçä uzdı. Respublika premyer-ministrı urınbasarı Zilä Wälieva comğa könne pravoslav dine wäkilläre belän oçraştı. Ul İske yolalar totuçı çirkäwneñ wäkillären qabul itte. Respublikanıñ awıl-rayonnarına yazğı qır eşläre däwam itä. Awıl xucalığı xezmätkärläre tırmalaw, çäçü, qırlarnı aşlama belän tuqlandıru eşlären başqaralar. Räsmi mäğlümätlärgä qarağanda, Tatarstanda bügenge köndä çäçü eşläreneñ nibarı unnan ber öleşe genä başqarılğan ikän. Alarnıñ töp öleşen may başında eşlänergä tieş, dip xäbär itälär respublikanıñ Awıl xucalığı ministrlığı wäkilläre.

Qalğan respublika xalqı isä inde comğadan uq may bäyrämnärenä äzerlänä başladı. Bu yulı tatarstanlılar 4 kön yal itäçäk – 1,2 may – bäyräm könnäre häm bu könnär yallarğa turı kilgängä 3,4 may da yal könnär itep iğlan itelde. Şulay itep, räxätlänep yal itärgä dä, miting, demonstratsiälärdä qatnaşırğa da, baqçalarda eşlärgä dä ölgerep bula. Könnär dä şaqtıy cılı, matur tora. Şuña da, älege yallarnı ayıruça tüzemsezlek belän kötälär. Citmäsä, kiläse atnada 3 kenä kön eşlägännän soñ, xalıqnı tağın yallar kötä. Bu yulı inde 9 may- Ciñü bäyräme uñayınnan. 30 aprel’dä 1 may – Xezmät häm yaz bäyrämenä respublika citäkçelegeneñ qotlawları da dönya kürde. Rusiäneñ Sotsial iminiät fondınıñ Tatarstan bülekçäse bäyräm uñayınnan 18 tatarstanlığa Oka maşinasın büläk itte. Avtomobillär xezmät invalidlarına tapşırıldı. Bu könnärdä Qazanda küpsanlı mädäni çaralar da ütä. Şuña kürä, awıllarğa yäki baqçalarğa kitmäwçelär dä, bäyräm waqıtlarında şähärdä üz-üzlärenä eş taba alaçaq.

Gölnaz İlgizär

XS
SM
MD
LG