Accessibility links

Кайнар хәбәр

"Ğiraq suğışı tämamlandı" dip iğlan itelügä ber yıl ütsä dä anda wäzğiat qatlawlı bulıp qala


Bügenge wäzğiattän ayırmalı bularaq näq ber yıl elek Washingtonda bötenläy başqa, bäyräm käyefläre taralğan ide. Bıltır maynıñ 1-endä prezident George Bush Ğiraqta suğışnıñ tämamlanuı, ilneñ totrıqlandıru çorına kerüe xaqında belderde. Läkin bügen Ğiraqta berniçä urında barğan çualışlar Quşma Ştatlarnıñ ildä demokratik cämğiat qoru eşendä qatlawlı problemalarğa tap buluın kürsätä.

Ber yıl elek Ğiraqta möhim suğışlarnıñ tämamlanuın häm anda Könbatış berektäşlegeneñ ciñüen tantanalı töstä iğlan itü öçen Quşma Ştatlar prezidentı George Bush, höcüm oçqıçına utırıp Ğiraqtan qaytıp kilgän oçqıç korabına töşkän ide. "Maqsatqa ireşelde!" digän şiğar aldında ul bolay dip belderde:

Audio, George Bush

"Ğiraqtağı möhim ğäskäri operatsiälär tögällände, anda Quşma Ştatlar häm bezneñ berektäşlärebez ciñep çıqtı" digän ide näq ber yıl elek amerikan prezidentı. Küp kenä amerikannar öçen bu bar Ğiraq suğışınıñ azağın añlattı, çönki alar iñ qan qoyğıç bäreleşlär näq menä Saddamnıñ ğäskäre belän bulaçaq dip kötkän ide. Bush belderüenä qädär amerikan xärbiläre Ğiraqtağı bäreleşlärdä 109, ä törle qazalarda 29, barlığı 138 keşesen yuğalttı. Ä xäzer inde ikençe san - 126. Näq menä şul xätle amerikan ğäskärie şuşı ayda ğına, ber aprildä hälak buldı. Şunıñ häm Ğiraqnıñ törle poçmaqlarında barğan çualışlar sürätendä prezident Bushnıñ äle bıltır uq, "möhim suğışlar inde tämamlandı" dip iğlan itüe torğan kübräk sorawlar uyata. Anıñ şuşı belderüennän soñ Ğiraqta 415, yäğni suğışta hälak bulğanğa qarağanda dürt märtäbä diärlek kübräk amerikan xärbie üterelde. Soñğı könnärdä iñ qatı bäreleşlär Ğiraqnıñ üzägendä, sönni ğäräplär yäşägän Fälüca şähäre tirälärendä bardı. Comğa könne, amerikannar annan üz ğäskärlären çığara başladı digän xäbärlär kilde, alar urının xäzer Ğiraqnıñ oyışıp kilgän üz qorallı köçläre alaçaq. Amerikannar ilneñ şığıylar yäşägän öleşendä, Näcäf şähäre tirälärendä dä bäreleşlär alıp bardı. Washington, soñğı çualışlarnı oyıştıru artında çit ildän kilgän terrorçılar, Saddamğa tuğrılıqlı elekke xakimiat wäkilläre tora dip isäpli, bu xaqta prezident Bush üze belderde. Anıñ fikerençä, Ğiraqtağı xakimiatne cirle idarägä küçerü waqıtı yaqınlaşqan sayın köç qullanu tağın da arta ğına ala.

Audio, George Bush

Quşma Ştatlar prezidentı George Bush. Amerikannar arasında yuğaltular arta barğan sayın Amerikanıñ üzendä şaqtıy bu çetrekle mäs''älägä äylänep kilä. İldä noyäbr ayında yaña prezident saylanaçaq häm Ğiraqtağı xällär nämzätlärneñ yarışında iñ üzäk problemalarnıñ berse bulıp tora. Bushnıñ köndäşe demokrat John Kerry inde elegräk tä xäzerge prezidentnı, Ğiraq suğışın tieşle itep äzerlämi häm xalıqara yaqlaw qazanmıy ğına başlawda ğäyeplägän ide. Xäzer inde tänqit, respublikan prezidentınıñ Ğiraqta tiz genä totrıqlı cämğiat urnaştıra almawına yünälderelä. Şuşı täräqqiat sürätendä Aq yort Ğiraq eşlärenä Berläşkän Millätlär Oyışmasın kiñräk cälep itü tırışlıqların kürä häm şunıñ yardämendä ildä yaña xakimiat urnaştıru eşlären caylıraq itep alıp barırğa ömetlänä.

Kärim Kamal, Praga
XS
SM
MD
LG