Accessibility links

шимбә, 3 декабрь 2016, Казан вакыты 12:43

İzrailneñ "Likud" partiäse yähüdlärneñ Gazadan kitüen xuplarmı?


İzraildäge "Likud" partiäse bügen premyer-ministr Ariel Şaronnıñ Gaza sızığındağı bar yähüd utarlarınnan da waz kiçü planı turında eçke referendum ütkärä. Şuşı plannı qabul itü yäisä kire qağu qararın "Likud"nıñ barlığı 193 meñläp äğzası biräçäk. Moña qädär Şaron täqdimen Quşma Ştatlar citäkçelege dä yaqlap çıqqan ide.

Tawış birü aldınnan Ariel Şaron üze citäklägän partiä äğzaların Gazadan kitü planın yaqlarğa öndäp çıqtı. Bügen irtän İzrail xökümäteneñ atnalıq utırışına barğanda premyer Şaron, "Likud" eçendä tawış birü İzrailneñ kiläçäge öçen xälitkeç bulıp tora dip belderde.

Audio, Ariel Şaron

"Bu tawış birü yazmışnı bilgelärlek, awır häm İzrailneñ bar ölkädä dä - iminlek, iqtisad, mäğärif, Quşma Ştatlar belän mönäsäbätlärendä alğa kitüen yä kiresençä çigenüen bilgeliäçäk iñ zur ähämiatkä iä. Härkem üz balalarınıñ kiläçäge turında tirän uylap minem plan öçen tawış birergä tieş" di İzrail premyer-ministrı Ariel Şaron. Ul täqdim itkän planda İzrailneñ Gaza sızığınnan yaqınça 7 meñ yarım yähüdne tulısınça çığaru qaralğan. Şulay itep Gazada ber genä yähüd utarı da qalmayaçaq. Berük waqıtta İzrail Könbatış Yardağı 4 keçkenä utarnı da beterergä cıyına. Şunnan soñ Şaron xökümäte fälästin ğäräpläre yäşägän Könbatış Yarnı İzraildän kiläse yıl azağına qädär "iminlek diwarı" belän ayırıp quyırğa teli. Şaron, fälästinlelär belän solıxqa ireşü kiläçäge bik tomanlı bulu säbäple, İzrail üz çiklären ışanıçlı itep saqlarlıq xälgä, bügen tawışqa quyılğan näq menä şuşı plan nigezendä genä ireşä ala dip belderä. Fiker beleşü näticäläre alayda, "Likud" äğzaları küpçelegeneñ Şaron planın kire qağuın kürsätä, ütä-uñ sanalğan şuşı partiä räsmiläre, İzrailneñ Gazadan tulısınça çığıp kitüe yähüdlärgä höcümnärneñ artuına ğına kiteräçäk dip isäpli. Şularnıñ berse Uzi Landau, Ariel Şaron planın ğämälgä quyunı tuqtatu bezneñ öçen bik tä möhim, çönki ul terrornı ğına oçındıraçaq dip belderä:

Audio, Uzi Landau

Bu İzrailneñ "Likud" partiäse wäkile Uzi Landau ide. Läkin Şaron planına İzraildä genä tügel, fälästin yağında da qarşı çığalar. Anda, İzrail yähüd utarların Gazadan ğına çığarıp, ä Könbatış Yarda yözlägän meñ yähüdne qaldırıp asılda fälästin cirlären İzrailgä quşarğa cıyına dip belderälär. Fälästinnärneñ xezmät ministrı Xäsän äl-Xatıyp, "bez här oçraqta da ottıraçaqbız" dip isäpli.

Audio, Xäsän äl-Xatıyp

"Ägär dä Şaron ciñsä, bu solıx urnaştıru eşläre öçen yaxşı xäbär bulmayaçaq, çönki ul elek kileşengän "solıx xaritası"na qarşı kilä. Ägär dä inde ul ottırsa, bu da solıx öçen yaman närsä bulaçaq, çönki bu yähüd utarçıları öçen ciñü digän süz" di fälästin ministrı Ariel Şaron planınıñ bügen "Likud" partiäse refererendumına çığarıluı xaqında. Döres, anıñ näticäläre İzrail xökümäte öçen mäcbüri bulmayaçaq. "Likud"nıñ niçek tawış birüe irtägä irtän bäyän iteläçäk dip kötelä.

Kärim Kamal, Praga
XS
SM
MD
LG