Accessibility links

Кайнар хәбәр

Başqortstan xakimiate Salawat Yulaydan yaña Che Guevara yasamaqçı


"Azatlıq" radiosınıñ yäkşämbe "Awlaq öy"enä räxim itegez, qäderle tıñlawçılar! Aldağı minutlarda sezneñ belän Kärim Kamal bulaçaq häm min bügen sezgä ike qısqa ğına söyläşü täqdim itärgä cıyınam. Şularnıñ berençese - Başqortstanda Salawat Yulay tuuınıñ 250 yıllığına äzerlänü turında, ikençese - Samarda tatarça qotlaw kartları çığaru xaqında. Temalar beraz qorıraq yañğırasa da, söyläşülär qızıqlı bulaçaq, bezdän ayırılma kürmägez!

Salawat Yulaynıñ 250 yıllığına äzerlek turında bezgä äle genä Kärim Yauşev ta söylägän ide inde. Ul yüngä bilgelängän tantanalarnıñ kübräk säyäsi yağına tuqtalıp kitte, bez isä yubileynıñ beraz zamançaraq aspektina qağılırbız. Başta şuşı atnada Ufadağı xäbärçebez alğan ber äñgämädän özek, Salawat torımışın öyränüçe Miras İdelbayev söyli.

Audio, Ufa

Şulay itep, Salawat Yulaynı Robin Hoodqa, Spartakka, xätta Jeanna d''Arque-qa tiñläwçelär dä bar. Bu atnada Başqortstannıñ Yäşlär eşläre komitetı, prezident idaräse belän bergä, älege isemlekne kiñäytep, mäşhür başqort batırın kürenekle sul radikal Che Guevara belän dä ber rätkä quyarğa buldı. Ul respublikada xalıq qaharmanı Salawatnıñ yaña ber sänğäti süräten buldıru konkursın iğlan itte. Anda ciñep çıqqan rässam-designer, başqort qaharmanına yaña ber popülär sürät uylap çığarğan öçen 20 meñ sum alaçaq. Konkursnıñ maqsatları turında anı oyıştıruçılardan başqa berkem dä yaxşıraq belä almıy, şuña kürä min bu xaqta Başqortstan prezidentınıñ matbuğat wäkile Rostislav Morzağulov belän söyläşep alırğa buldım. Aldan uq şunı äytep kitim - Rostislav äfändeneñ yardämçe xanımı, "ul başqortça söyläşäme?" digän sorawğa, "Rostislav Rafkatoviç sezgä niçek kiräk, şulay söyläşäçäk" disä dä, Morzağulov äfände ädäbi başqort telen belep betermäwe säbäple älegä urısça söyläşergä buldı. Anıñ cawapları şul teldä yañğırayaçaq. Berençe soraw - "sez bu eşkä, yäğni Salawat Yulaynıñ yaña sänğäti süräten buldıruğa ni öçen alındığız?"

Audio, Rostislav Morzağulov

Läkin sez beläsez mikän, Che Guevara bar dönyada sul radikal, Amerika imperializmına qarşı köräşüçe bularaq tanılğan, xäzer anı näq menä şul säbäple global''läşügä qarşı çıqqan yäşlär üzläreneñ kumirı itep kürä. Menä äle kiçä genä min Praga uramnarında, Çexiäneñ Yevropa Berlegenä kerüenä häm dönyanıñ global''läşüenä qarşı uram cıyını ütkärgän anarxistlarnı kürdem, alarnıñ kübesendä inde telgä alınğan Che Guevara süräte töşerelgän kiemnär ide. Salawat Pugaçev belän bergä Rusiä xakimiatenä, yäğni başqortlar oçrağında kolonizatorlarğa qarşı köräşkän keşe bularaq tanılğan, xäzerge çorda da anıñ yaña obrazı şunı çağıldıraçaqmı? dip soradım min Rostislav Morzağulovtan.

Audio, Rostislav Morzağulov

Yäğni süz biredä fäqät Salawatnıñ üz süräten üzgärtu, yäisä döresräk itep äytkändä, süräten buldıru turında ğına bara, sez anıñ tarixi rolenä bötenläy qağılmıysız?

Audio, Rostislav Morzağulov

Sez Rusiädäge, häm ayırım alğanda Başqortstandağı xäzerge yäşlär arasında ğadellek öçen köräşü ideäse bik cäyelgän dip uylıysızmı?

Audio, Rostislav Morzağulov

Bu "Awlaq öy"neñ, häm ğomumän "Azatlıq"nıñ, Başqortstan prezidentınıñ matbuğat wäkile itep küptän tügel genä bilgelängän Rostislav Morzağulov belän berençe äñgämäse ide, qäderle duslar. Min aña tıñlawçılarıbız isemennän räxmät belderep, kiläçäktä dä Ufadan qızıqlı mäğlümat alıp torırbız digän ömettä qalam.

Audio, break

İnde ber muzıkal'' tänäfes yasap alıyq. April azağında ğına Qazanda Mälikä isemle yäş cırçınıñ yaña kompakt diskı dönya kürde, duslar. Färidä Qudaşeva, Älfiä Abzalova, Mönirä Bulatovalarnı söyüçelär Mälikäne tatar çırçısına sanamas ta bälkem, ul bötenläy başqa buyın wäkile. Läkin tatar yäşläre anıñ çırların yaratıp tıñlıylar... häm biilär, monısı da xäzer bik ähämiatle. Menä üzegez tıñlap qarağız äle.

Audio, Mälikä

Sez "Azatlıq" radiosınıñ "Awlaq öy"endä qunaqta, xörmätle tıñlawçılar, utırmabıznıñ çirattağı säxifäsenä küçep bez Samarğa yul totarbız. Läkin başta Qazanğa suğılıp çığıp... Küptän tügel genä anda bulırğa turı kilde, häm ğädättägeçä kitap kibetenä kergäç, min anda ğömeremdä ikençe märtäbä tatarça qotlaw kartları kürügä ireştem. Berençe tapqır tatarça "Yaña Yıl belän!" dip yazılğanın min äle yıraq sovet çorında uq kürgän idem. Döres, bu berdänber täcribä buldı, şunnan soñ inde andıyları da küzgä çalınmadı. 2004-nçe yıl yazında min beryulı 8 törle tatar qotlaw kartın kürü bäxetenä ireştem. Alarnıñ barısı da zamança, zäweq belän, iğtibarnı cälep itärlek itep eşlängän ide. Mineken dä nıq cälep itü säbäple min alarnıñ barısın da aldım, häm soñğıların aldım bulıp çıqtı - ul kibettä dä tatar kartları qalmadı. Anıñ qarawı min alarnı kem çığaruı xaqında mäğlümatkä tap buldım. Kartnıñ härbersendä anıñ, döresräge alarnıñ isemnäre häm torğan şähärläre yazılğan ide - Marat wä Rinat, Samar qalası, telefon. Qalğanı inde waqıt mäs''äläse genä ide. "Awlaq öy" öçen min Marat Ğäripov belän söyläştem. Xäzer sezgä şul äñgämäne täqdim itäm. Nindi teldä söyläw mäs''äläse bu yulı da kütärelde, läkin ul üzennän-üze niçekter caylı ğına çişelde.

Audio, Marat Ğäripov

Samardan Marat Ğäripov belän söyläşü bezne "Awlaq öy" utırmasınıñ azağına yaqınayttı, min inde sezneñ belän xäzergä xuşlaşırğa tieşmen, qäderle duslar. İsän-imin torığız, "Azatlıq"tan ayırılmağız, xatlar yazğalağız! Bezneñ adresnı sez www.azatliq.ru säxifäsendä taba alasız. Sezneñ belän Kärim Kamal buldı, saw bulığız!
XS
SM
MD
LG