Accessibility links

дүшәмбе, 5 декабрь 2016, Казан вакыты 11:27

1 May bäyräme tınıç ütte


May başında 10 könnän artıq bara torğan yal dekadası başlanıp kitte. Bu düşämbe häm sişämbe könnärendä räsmi bilgelängän yal könnäre. Annarı kemder eşli, ä kemnärder şulay uq bäyräm yäki yal möxitendä qala. Barı tik awıl xezmätçännäre genä bu könnärdä cir tırnaw, çäçü belän mäşğül. Yäkşämbe, düşämbe könnärendä yañğır yawuğa qaramastan, awıl keşese “saban çäçsäñ, sazğa çäç” dip basudan qaytmıy.

1 May bäyräme Qazanda tınıç qına ütte. Sovet zamannarında demonstratsiälärdä qızıl älämnär, transparantlar totıp yögerergä künekkän xalıq baqçasına aşıqtı yäki öydä genä bäyräm itte. Xezmät iäläreneñ sıynfi köräştä teläktäşlege xäzer inde qısqaraq häm ğadiräk şiğar astında ütä - Yaz häm Xezmät bäyräme dip atala ul. Däwlät Şurası räise F.Möxämmätşin respublika xalqın şuşı bäyräm belän qotladı.

Sıynfıy köräş yolaları xäzer modada tügel. Kommunistlar partiäse häm Жизнь firqäse Qazanda urtaq miting ütkärergä cıyınsalar da, alarnıñ maqsatları üzgäräk bulu säbäple, säyäsi qawışu nasıyp bulmadı. Kommunistlar üzläre genä İrek mäydanında miting ütkärde. Monda kilgän öç yözläp keşe qarşında Aleksandr Saliy häm başqalar çığış yasadı. Ämma bu cıyın ğädättägedän sülpänräk buldı. Ä menä profsoyuzlar “Berdäm Rusiä” firqäse belän bäyrämne bergä ütkärde. Alarnıñ urtaq mitingına ike meñläp keşe cıyıldı. Demonstrantlar törkeme İrek mäydanınnan Kreml'' uramına çığıp, Spas manarası häm şähär xakimiäte urnaşqan bina qarşında, 1 May mäydanında miting ütkärdelär. Profsoyuzlar bu yulı Rusiä yäki respublika xakimiäten tänqitlämäde, kiresençä, xakimiät firqäse dip atalğan “Berdäm Rusiä” aktivistları belän urtaq qiblada ikänlegen kürsätte. Profsoyuzlar citäkçese Tat''yana Vodop''yanova, “Berdäm Rusiä” firqäse Tatarstan bülegeneñ Başqarma komitet räise Viktor Budarin häm başqa aktivistlar bu çaranı bergä ütkärde. Xalıq, döresräge profsoyuz belän partiäneñ berlegen rasladı bu cıyın.

Rimzil Wäli

XS
SM
MD
LG