Accessibility links

шимбә, 10 декабрь 2016, Казан вакыты 12:06

Gruziä belän Acarstan arasında kierenkelek arta: Saakaşvili Abaşidzeğa "buysınu" öçen 10 kön waqıt birde


Yäkşämbedä Acarstannı Gruziäneñ qalğan öleşe belän bäyläp torğan berniçä küper şartlatıldı. Acar citäkçese Aslan Abaşidze monı Gruziäneñ ixtimal xärbi ğämälenä qarşı kisätü çarası dip atadı. Gruziä prezidentı Mixail Saakaşvili Acar citäkçesenä üzäkkä buysınu öçen 10 kön waqıt birde.

Yäkşämbedä Gruziä prezidentı Mixail Saakaşvili Acarstan citäkçese Aslan Abaşidzeğa ultimatum belderep, qorallı törkemnärne qoralsızlandıru, täbäktä Gruziä qanunnarın qaytaru öçen 10 kön waqıt birde:

Audio (Mixail Saakaşvili)

"İminlek Şurası utırışında bez Aslan Abaşidezğa, soñğı tapıq waqıt birergä qarar ittek. Gruziä konstitutsiäse qısalarına qaytu, keşe xoquqların bozu, qulğa alular, jurnalistlar häm başqa keşelärne qıynawlarnı tuqtatu öçen bez aña 10 kön waqıt biräbez."

Bu taläplär ütälmäsä, Saakaşvili, Acarstannıñ idarä buınnarın ğämäldän çığarıp, yaña saylawlar iğlan itäçägen belderde:

Audio (Mixail Saakaşvili)

"Abaşidze 10 kön eçendä qanunnı qaytarırğa, qoralsızlandıru eşlären başlarğa tieş. Bolar eşlänmäsä, Gruziä prezidentı konstitutsiä nigezendä Acarstanda cirle idarä buınnarın ğämäldän çığarıp, yaña saylawlar iğlan itäçäk. Berük waqıtta Acarstannıñ avtonomiäse, demokratik statusı saqlanıp qalaçaq, Acar xalqına irekle saylaw mömkinlege bireläçäk."

Bu belderüen Saakaşvili yäkşämbedä, üzbilgelängän Acarstan töbägen Gruziäneñ qalğan öleşe belän bäyäläp torğan 3 küper şartlatılğannan soñ yasadı. Acar citäkçese Aslan Abaşidze monı Gruziäneñ Acarstanğa qarşı ixtimal xärbi ğämällären buldırmas öçen kisätü çarası dip atadı. Comğa könne Gruziä ğäskärläre Acar çikläre buyında xärbi künegülär başlağan ide. Gruziä tarixında iñ ere bu künegülärdä 2 meñläp xärbi qatnaşa. Abaşidze, Gruziä Acarstannı köç belän basıp alırğa teli dip, uzğan atnada töbäktä ğädättän-tış xäl iğlan itte. Mäskäw taraflı Acar citäkçese, andıy basıp kerü bula qalsa, tieşle cawap bulaçaq dip kisätte. Bilgele bulğança Batumida Rusiäneñ xärbi nığıtması bar. Yäkşämbedä Rusiäneñ Tışqı eşlär ministrlığı wäkile Aleksandr Yakovenko Exo Moskvı radiosına, Acarstanğa qarşı köç qullanu bulsa, monıñ näticäläre qotıçqıç bulaçaq, dip kisätte. Gruziä premier-ministrı Zurab Jvania Azatlıqqa birgän äñgämäsendä, bu wazğiätne çişüdä Mäskäw belän xezmättäşlek itergä teläwen äytte:

Audio (Zurab Jvania)

"Bez Rusiä bu mäsäläne çişügä möhim öleş kerter dip ömetlänäbez. Bolay dip äyter öçen nigez bar: bezneñ illär arasında xäzer mönäsäbätlär cılıraq, ışanıç köçleräk, urtaq mänfäğätlär küp, bolar qarşılıq tügel, xezmättäşlek öçen nigez bulıp tora."

Yevropa Şurası general sekretare Walter Schwimmer, (Abaşidze belän Saakaşvili arasında aradaşçı wazifasın ütägän räsmi) Tbilisi belän Batumi arasında soñğı xällärne qurqınıç täräqqiät dip bäyäläde. Tbilisidan bäysezlek dawlağan Acarstan Abaşidze qulı astında Şevarnadze çorında uq de-facto möstäqil yäşäde. Ğinwar ayında prezident bulıp saylanğan Saakaşvili, bu töbäkne Gruziä qısalarına qaytarırğa wäğdä itte. Üz näübätendä Abaşidze Saakaşvilinı Acarstanda diktatorlıq urnaştıru niätendä ğäyepli. Mart ayında Saakaşvili töbäkkä kertelmiçä, borıp cibärelgännän soñ kiereklek artqan ide. Ul çaqta taraflar kileşügä ireşä aldı. Ämmä ozaqqa tügel. Tbilisi Batuminı kileşülärne bozuda ğäyepläde. Şunnan bilre kierenkelek könnän kön arta bara.

Ali Gilmi, Praga
XS
SM
MD
LG