Accessibility links

Кайнар хәбәр

Acarstanda Tbilisi xakimiate urnaştırıldı, xäzer inde çirat Abxaziäme?


Gruziädäge üzäk xakimiatneñ Acarstan citäkçese Aslan Abaşidze belän qarşılığı suğışsız ğına tämamlandı - Rusiä aradaşlığı yardämendä acar citäkçese xakimiattän kitüen iğlan itte häm şunda uq Acarstannan Rusiägä kitep bardı. Batumda yänä Tbilisi idaräsen urnaştırunı üzeneñ zur uñışı dip bäyälägän gruzin prezidentı Saakaşvili yaqın kiläçäktä bar ilne berdäm itärgä cıyınuın belderä.

Acar başqalası Batumda soñğı berniçä kön eçendä säğätläp arta barğan kierenkelek çärşämbe kiçen üzara qotlawlar, Aslan Abaşidzegä qarşı torğan oppozitsiä wäkilläreneñ çiksez şatlanuı belän tögällände. Bıltır Tbilisidä xakimiat almaşınğannan soñ Gruziäneñ yaña citäkçeläre belän kileşä almağan Abaşidze Acarstan belän xakim itüdän waz kiçüen belderde häm ilne taşlap kitärgä buldı. Şuşı qararın ul, töbäktä qan qoyuğa qul quyarğa telämäwe, üzäk xökümätkä Batumda qoral qullanu öçen säbäp birergä cıyınmawı belän añlattı.

Audio, Aslan Abaşidze

Soñğı könnärdäge täräqqiatne küzätep barğannan soñ Abaşidzeneñ Saakaşvili belän qarşılığı yaña watandaşlar suğışına kiterä ala digän qurqularnı arttırğan ide. Şuşı qarşılıq älegä tınıç qına xäl itelde. Wäzğiatne caylaw eşenä Rusiä dä quşıldı, çärşämbe kiçen Batumğa Mäskäwdän İminlek Şurası sekretare İgor'' İvanov kilde häm kire Rusiägä qaytqanda ul üze belän Abaşidzene, anıñ ulın häm berniçä yaqın kiñäşçesen dä aldı. Acarstannıñ Mäskäwdäge wäkillegennän alınğan mäğlümatqa qarağanda, Aslan Abaşidzeneñ anda küpme waqıtqa qaluı bilgele tügel, şul ğına mäğlüm, elekkege acar citäkçeseneñ Rusiädäge säyäsi dairälär belän tığız elemtäläre bar ide, anıñ iñ yaqın duslarınnan berse bulıp Mäskäw xakime Yuri Lujkov tora, misal öçen. Ul Batumnan kitü belän Gruziä prezidentı Mixail Saakaşvili televideniä aşa Acarstannıñ Abaşidzedän qotıluın xäbär itte.

Audio, Mixail Saakaşvili

"Gruziä xalqı, Aslan qaçtı, Acarstan xäzer irekle. Min härkemne şuşı ciñü belän täbriklim. Gruziä berdäm bulıp kütärelergä tieş. Gruziä berdäm bulaçaq!" dip belderde Abaşidzeneñ töp köndäşe prezident Mixail Saakaşvili. Şunnan soñ ul da, parlament citäkçese Nino Burjanadze belän bergä Batumğa oçtı. Acarstandağı şuşı waqiğälär izge Georgiy könenä turı kilde, näq menä şul izge Gruziäne yaqlawçı bulıp tora. Batumdağı uñış Gruziä citäkçeläre iğtibarın xäzer qalğan ike baş kütärgän töbäkkä - Abxaziä häm Könyaq Osetiägä bora ala, Saakaşvili ilneñ berdämlege turında yışraq söyli. Gruziäneñ pravoslav patriarxı İlya ikençe monı açıqtan-açıq belderä, izge Georgiy köne uñayınnan ul xalıqnı qotlap, "xäzer yul Abxaziä häm Tsxinvaligä, Könyaq Osetiä başqalasına" dip belderde.

Audio, İlya İkençe

Ämma Tbilisi Acarstanda yañadan üzäk xökümät idaräsen urnaştırsa da, anıñ avtonomiäsen beterergä cıyınmawın belderä. Bu xaqta premyer-ministr Zurab Jvaniä maxsus belderü yasadı. Anıñ süzlärençä, acar parlamentına yaña saylawlar inde yaqın kiläçäktä ük ütäçäk. Belgeçälär fikerençä, räsmi Tbilisi Acarstannı xäzer, buysındırası küpkä awırraq bulaçaq Abxaziä häm Könyaq Osetiä öçen ber ürnäk avtonomiägä äyländeräçäk.

Kärim Kamal, Praga
XS
SM
MD
LG